Nesta ocasión, As Maianas participan no concurso Vas sacar nota coa rumba "O cantar das Maianas". A fase de votacións deste concurso estará aberta ata o día 28 de agosto. As votacións para o premio do público poden facerse a través da páxina web: http://www.crtvg.es/vas-sacar-nota/. Para votar a través desta web, só hai que rexistrarse e xa poderás acceder ás votacións, tendo dereito a votar unha vez ao día por IP.

Para votar polas Maianas tamén se pode chamar á Radio Galega. Polas mañás hai que chamar (981 540 956 /981 540 966) ao programa Galicia por diante, entre as 12:15 e as 12:45 horas aproximadamente, mentres que polas tardes hai que chamar (981 540 979/981 540 989) ao programa A tarde a partir das 18:30 horas.

Este é o cuarto ano consecutivo no que este grupo musical de Ames participan neste concurso. Cómpre destacar que na edición de 2012 acadaron o premio do xurado coa canción 'Xa te olvidaches de min'. No ano 2013 participaron neste concurso coa canción 'Vaite co vento', e o ano pasado fixérono coa canción "Sabes?".

Segundo indican dende o grupo As Maianas “somos un grupo de mozas cantareiras do Val da Maía, que dende o 2007 levamos a nosa música por toda Galicia. Nestes oito anos publicamos dous traballos discográficos, “Xota da Amaía” (2006) e “Como canta” (2007), colaboramos con recoñecidos grupos da nosa música e fomos gañadoras do concurso da Radio Galega “Vas Sacar Nota” (2012) e do “Novos Valores” (2015) do Festigal. Os nosos temas mesturan creacións propias con letras e melodías recollidas da tradición oral. Apostamos polos xogos vocais e acompañamos as voces con instrumentos tradicionais de percusión, introducindo tamén a guitarra, a frauta tenor ou o clarinete”.