O alcalde de Ames, José Miñones, acompañado da concelleira de Promoción Económica, Isabel González, e do axente municipal de desenvolvemento local, Jorge Couñago, visitaron esta semana 10 empresas que están instaladas nos lofts do Novo Milladoiro. Tratouse dunha toma de contacto entre a dirección destas empresas e mailo goberno municipal.

As empresas que se visitaron foron: Ozono (empresa de programadores informáticos que traballan coa Axencia EFE, Meteogalicia e Televisión de Galicia, entre outras compañías), Kúpula (empresa de construción), Juan Capellá (Economistas - Auditores), Data Center (administración electrónica de distribuidoras), Orgadata (empresa alemá composta por dous programadores informáticos que traballan en solucións informáticas para o sector do metal), Gonzalo Redondo (deseñador de catamaráns), Stellgus Abogados & Asesores (servizos xurídicos), Intedya (consultora de calidade e medio ambiente e Normas ISO), Zadia Software (programadores informáticos de desenvolvemento de aplicacións web e APP) e Staff Hotel (externalización de servizos para o sector hoteleiro).

A través destas visitas o goberno municipal pretende coñecer as instalacións de ditas empresas, o funcionamento desta entidades relacionadas co eido tecnolóxico, as súas inquedanzas e favorecer a súa visibilidade. Tamén se intenta favorecer a creación de sinerxías comúns coa Administración local. A comezos do mes de maio continuarase coa visita a empresas situadas neste lofts do polígono. Asemade, tense previsto durante os vindeiros meses visitar outras entidades como Zenit Televisión ou Bahía software, que vén de instalarse no concello de Ames.

O goberno municipal está realizando unha serie de visitas que vai a levar a cabo nos próximos meses ás empresas do concello, para coñecer de cerca o perfil e as necesidades que se plantexan. O alcalde e a concelleira de Promoción Económica resaltan o alto grado de profesionalidade e o nivel que están a acadar as empresas tecnolóxicas de Ames con recoñecementos internacionais e premios como o recentemente obtido na Deputación da Coruña pola empresa OpSeeker Tech, galardoada co premio de Mellor Iniciativa Empresarial Nova.

O alcalde de Ames, José Miñones, resaltou que “o parque empresarial do Milladoiro destaca pola implantación de empresas do audiovisual e tecnolóxicas de referencia internacional. Imos a seguir apostando por atraer talento e empresas importantes como recentemente sucedeu con Bahía software. Asemade, teño que agradecer ás empresas que nos recibiron e ensinaron as súas instalacións, así como a Ángel e Emilio que nos acompañaron na visita”.