O obxectivo de dita visita foi coñecer as instalación de Trameve, unha entidade coa que dende o mes de marzo leva traballando o Concello de Ames. Deste xeito, o centro de Tratamento Medioambiental de Vehículos, Trameve SL, é o encargado de xestionar o servizo de retirada de vehículos abandonados no termo municipal de Ames. Para iso emprega unha plataforma-grúa co fin de trasladar ditos vehículos ás instalacións que ten esta empresa no polígono industrial do Tambre, en Santiago de Compostela.

O horario da prestación do servizo é de luns a venres, en horario de mañá, de 9:30 a 13:30 horas, e de tarde, de 15:00 a 19:00 horas. Esta entidade ten encomendadas as tarefas de recoller aqueles vehículos abandonados e declarados residuos sólidos urbanos (RSU) ou que estean en proceso de declaración de RSU por parte do Concello de Ames, o traslado ás súas dependencias, depósito e custodia durante cinco días naturais, tramitación de baixa, descontaminación e tratamento ecolóxico gratuíto.

Durante o 2016 o Concello, a través desta empresa, retirou 10 vehículos das rúas amesás. Ademais, durante este ano, 19 vehículos, que estaban en tramitación, foron retirados polos seus propietarios, e hai 11 expedientes abertos, que está pendente de finalizar a súa tramitación para poder retirar ditos vehículos.

Importante labor social
O alcalde de Ames, José Miñones, destaca que “Ames é un dos poucos concellos galegos que traballa con esta entidade que desenvolve un importante labor social. Ademais, este centro dispón de todos os certificados que marca a normativa, e o máis importante, desenvolve unha imporante labor social, favorecendo a inclusión laboral das persoas con discapacidade”.

Trameve ten 12 persoas traballando, todas elas menos unha, con discapacidade. É un centro especial de emprego sen ánimo de lucro que forma parte de Galega de Economía Social, grupo de empresas que pertencen a COGAMI (Confederación Galega de Persoas con Discapacidade) e que teñen por finalidade contratar a persoas con discapacidade, darlles unha oportunidade laboral. Esta entidade naceu no ano 2000, a partir dun proxecto europeo, e dedícase ao despece ecolóxico de vehículos sinistrados ou fóra de uso que chegan ata as instalacións de máis de 13 mil metros cadrados situadas no polígono do Tambre. Ata a actualidade, son más de 78 mil as pezas estocadas que ten Trameve á venda e tamén, a partir deste ano, dedicase á venda de vehículos de ocasión.

Esta iniciativa é única porque cumpre tanto a función social, que favorece a inclusión laboral das persoas con discapacidade e por outro lado, coida o medio ambiente porque todos os vehículos que chegan a este centro son sometidos a un minucioso proceso de descontaminación, retirando todo o contido contaminante e que vai ser trasladado a colectores especiais de tratamento de residuos. Os vehículos que chegan a estas instalacións fano a través de particulares, aseguradoras ou concellos, como é o caso de Ames.

Colaboración en materia de accesibilidade
Por ultimo, o concelleiro de Urbanismo, Obras Públicas e Servizos Básicos, Blas García, explicou que “dende o goberno estamos vendo a posibilidade de traballar con Trameve noutros servizos. Ademais, de cara ao vindeiro anos temos a intención de abrir novas vías de colaboración con COGAMI, tanto de cara a mellorar a atención das persoas con algún tipo de discapacidade, como para a execución de obras de mellora da accesibilidade”.