Este pasado luns, 9 de abril, realizouse unha xuntanza do concelleiro de Educación e Cultura, David Santomil, cunha representación das ANPAS dos centros con servizo de comedor escolar. O obxectivo desta xuntanza foi informar dos datos provisionais de renovación e preinscrición de solicitudes nos programas de conciliación. Deste xeito, durante o mes de marzo, na Rede Municipal de Comedores Escolares, renovaron en prazo un total de 1.059 usuarios/as e rexistráronse 258 novas solicitudes.

Ademais, dende a Concellaría de Educación considerouse necesario trasladar ao Consello Escolar Municipal de Ames todas as dúbidas e propostas das ANPAS e do Concello de Ames sobre a dispoñibilidade de prazas de escolarización e dos programas de conciliación. Así, convocarase un pleno extraordinario deste órgano no mes de maio, para avaliar os datos de escolarización e dos programas de conciliación para o próximo curso escolar.

Por outra banda, cómpre salientar que a ordenanza fiscal e o regulamento da Rede Municipal de Comedores Escolares actualizáronse en febreiro de 2018, para incorporar as bonificacións ás cotas dos usuarios/as e integrar os decretos que regulaban o servizo dende o ano 2011. Dita modificación debateuse no Consello Escolar Municipal o pasado 9 de novembro de 2017, aprobouse en Pleno o 30 de novembro de 2017 e superou sen alegacións o período de exposición pública. Finalmente, entrou en vigor o 1 de febreiro e o 14 de febreiro de 2018 respectivamente.

No artigo 22 do regulamento de comedores indícase que unha vez adxudicadas as prazas correspondentes ás renovacións, as prazas vacantes serán asignadas ás/aos solicitantes de novo ingreso. No caso de que o número de solicitudes de novo ingreso supere a oferta, farase unha selección e terán prioridade as familias empadroadas no Concello de Ames, así como aquelas familias que teñen a necesidade de conciliar a vida laboral e familiar e aquelas con necesidades sociais e económicas.

O concelleiro de Educación, David Santomil, apunta que “dende o ano 2015 incrementáronse máis de 200 prazas de comedores escolares para intentar atender á crecente necesidade de conciliación das familias. Crearase por primeira vez unha comisión de baremación con representantes das ANPAS e convocarase o Consello Escolar Municipal para debater de novo sobre o modelo e criterios de xestión dos comedores e dos programas de conciliación. Ademais, nos anos 2017 e 2018 actualizáronse as ordenanzas e o regulamento para adaptalo ás necesidades escolares que, á súa vez, son susceptibles de calquera modificación futura se así o considera o Consello Escolar Municipal”.

Contido relacionado

Lindeiros: "Máis de 60 nenos poderían quedar sen praza nos comedores escolares de Ames"
La Voz de Galicia: "Las Anpa de Ames ven «insostible» la saturación de todos los colegios"
Compostela 24 Horas: "138 niños podrían quedarse sin plaza de comedor en Ames"
La Voz de Galicia: "Ames registra 1.317 solicitudes de comedor escolar pero hay 1.252 plazas"
El Correo Gallego: "Os pais de Ames participarán na baremación do comedor"