Os diferentes programas de conciliación de Ames teñen como liñas de actuación prioritarias a educación para a saúde, a educación para a convivencia e a educación para o ocio. Os programas de conciliación do Concello de Ames abarcan desde a primeira hora do día, cos Bos días coles, pasando pola comida principal nos Comedores escolares, ata a última hora coas Tardes divertidas. Ademais dentro destes programas tamén están incluídos os lúdicos, que teñen lugar nos períodos de vacacións de Entroido, Primavera, Setembro e Nadal, así como as Escolas de verán (xullo e agosto), xusto naquelas datas de maior dificultade de conciliación para as familias amesás.

Todos estes aspectos foron os que se lle explicaron ao alcalde do Concello de Macael, situado na provincia andaluza de Almería, Raúl Martínez Requejo, e ao tenente de Alcalde e concelleiro de Urbanismo e Seguridade, Guillermo Casquet Fernández, que estiveron esta mañá no concello de Ames. O concelleiro de Educación, David Santomil, a técnica de Educación, Rosa García, e a técnica municipal de nutrición, Rosalina Martínez, mantiveron unha xuntanza no Pazo da Peregrina co alcalde e concelleiro de Macael, co obxectivo de explicarlles o funcionamento dos comedores escolares e do resto de programas de conciliación de Ames.

O interese por este servizo xorde a raíz do premio Progreso, outorgado en decembro de 2018 pola Federación Andaluza de Municipios e Provincias, ao Concello de Ames polo proxecto Concili@mes. A partir de aí o Concello de Macael establece contactos co goberno de Ames para coñecer a fondo dito proxecto. Deste xeito, esta maña, ademais de manter unha xuntanza, os representantes do goberno municipal do Concello de Macael visitaron as instalacións do comedor do CEIP Agro do Muíño.

Por último, realizouse un un acto de recepción no salón de plenos da Casa do Concello, onde participou o alcalde de Ames, José Miñones, e o tenente de Alcalde e concelleiro de Educación, David Santomil, xunto con concelleiros/as do grupo de goberno. Deste xeito, Ames sérvelle ao Concello de Macael como referente en servizos de conciliación de educación.
 
Rede Municipal de Comedores Escolares
Os servizos complementarios de educación e conciliación, no que está incluída a Rede Municipal de Comedores Escolares, teñen como principal obxectivo conciliar a vida familiar e laboral de todos os veciños e veciñas de Ames. O servizo da rede de comedores escolares, un servizo xestionado directamente polo Concello, está dirixido ao alumnado de infantil e primaria. Actualmente, hai 1.381 alumnos/as matriculados/as nos comedores escolares para o curso 2019-2020. Deste total, 147 usuarios/as teñen un tratamento alimentario específico debido a algún tipo de alerxia ou intolerancia.

Ademais da rede de comedores municipal, o Concello de Ames ofrece outros servizos de conciliación durante o curso escolar. Trátase dos programas Bos Días Cole e Tardes divertidas. Ambos os dous programas están dirixidos ao alumnado de segundo ciclo de Educación Infantil e Primaria. Durante o curso 2019-2020 hai 348 alumnos matriculados no programa Bos Días Cole e 221 nas Tardes Divertidas.

Amplíase o servizo de comedores escolares á escola unitaria da Tarroeira
Estes servizos complementarios de educación e conciliación ofrécense no CEIP A Maía; CEIP Agro do Muíño; CEIP de Barouta; no CEP de Ventín; e na Escola de Educación Infantil do Milladoiro. Ademais, durante este curso escolar ampliouse o servizo de comedores escolares á escola unitaria da Tarroeira, situada na parroquia de Ortoño. É a primeira vez que se ofrece dito servizo nunha escola unitaria do concello que actualmente conta con 5 usuarios/as.

A través do proxecto Concili@mes apóstase por un servizo de calidade, que ademais de favorecer a conciliación da vida familiar e laboral, tamén aposta pola educación en hábitos saudables. A realización de menús saudables con produtos frescos e de temporada mercados no pequeno comercio local, e a posibilidade de afrontar as diferentes intolerancias e alerxias alimentarias que se dan entre os usuarios/as, foron aspectos moi valorados por parte do goberno municipal de Macael.