A través desta actuación o goberno municipal pretende paliar as deficiencias detectadas na Casa da Cultura de Bertamiráns, que é un dos locais municipais máis usados e con maior afluencia de veciños e veciñas, tanto para realizar actividades que imparte o Concello (Escolas culturais, Escolas deportivas, actividades da Oficinas de Voluntariado, etc) coma para a asistir a espectáculos teatrais e musicais que forman parte da programación municipal, así como as actividades das asociacións e colectivos locais.

As obras de mellora afectan á cuberta do edificio, ao sistema de calefacción, á impermeabilización da fachada e ás zonas con humidade. Ademais, modificarase o patio de butacas e o anfiteatro para que os espectadores gañen visibilidades nos espectáculos que se representan no auditorio (incrementarase a pendente do solo das dúas zonas de butacas) e vaise crear un novo acceso dende o interior do auditorio á cabina de técnicos.

O concelleiro de Educación e Cultura, David Santomil, destaca que “se trata dunhas obras moi necesarias e urxentes polo que a empresa adxudicataria comezará os traballos canto antes e durante o verán. Dende o goberno démoslle prioridade a estas obras que están incluídas dentro do Plan de Obras e Servizos (POS) da Deputación provincial da Coruña. Trátase dunha reforma integral deste edificio municipal, a primeira con carácter global e que afecta ao auditorio dende o ano 1997, momento no que se inaugurou este centro sociocultural”.

Anexo á Casa da Cultura
A única modificación que se realizou na Casa da Cultura de Bertamiráns foi a execución dun local que dispón dunha superficie de 512 metros cadrados e que está encadrado ao carón do centro sociocultural. Este anexo, que foi rematado no ano 2011, permitiu ampliar o espazo da Casa da Cultura con novas oficinas para o persoal municipal, unha sala de exposición e outra sala onde se imparten outro tipo de actividades: deportivas, culturais, etc.