O goberno municipal de Ames anuncia que a Deputación da Coruña aceptou a solicitude que se fixo desde o Concello é ditou unha resolución pola que se establecen a partires do ano 2017 dous períodos de pago en período voluntario dos recibos do IBI. O alcalde de Ames, José Miñones, agradécelle á Deputación que “teña atendido esta demanda que cremos importante e necesaria e da que se beneficiará toda a veciñanza amesá”.

Na resolución establécese a posibilidade de pagamento do recibo do IBI a partires do ano 2017 en dous cargos sen ningún tipo de custe, a metade do importe pagarase o día 30 de xuño ou inmediato hábil anterior, e a outra metade o último día do período de pago da segunda voluntaria ou inmediatamente hábil anterior, que como regra xeral é o día 20 de outubro.

Será necesario para acollerse a este novo sistema especial de pago que se entregue unha solicitude expresa do obrigado tributario con un mes de antelación á data do primeiro cargo, aproximadamente antes do 31 de maio, é ademais deberá estar domiciliado o pago nunha entidade bancaria.

Durante o primeiro trimestre do vindeiro ano o goberno fará unha campaña de difusión onde dará a coñecer este novo sistema especial de pago do IBI ao que voluntariamente poderá acollerse calquera veciña/o que así o desexe.

A concelleira de Economía e Facenda, Genma Otero manifesta que “no goberno de Ames celebramos que a Deputación da Coruña atendera á nosa petición aínda que con atraso, pois esta medida vai aliviar as economías das nosas veciñas/os facilitando o pago deste imposto en dous prazos sen ningún tipo de custe engadido, imposto o IBI que a todas luces é o máis gravoso para a veciñanza”.

Contido relacionado

La Voz de Galicia: " El Concello permitirá el pago fraccionado del IBI a partir del 2017"