[29-09-2014] “Activando o teu futuro” é o título do obradoiro que, dirixido a mozos e mozas de 18 a 30 anos, se desenvolverá en Ames o venres, 10 de outubro de 2014. Trátase dun monográfico de motivación no que se traballarán habilidades e destrezas que optimicen a busca de emprego ou motiven o autoemprego entre a poboación máis xove de Ames. O obradoiro forma parte do Programa Activa 2014 da Dirección Xeral de Xuventude e Voluntariado da Consellaría de Traballo e Benestar e chega a Ames solicitado pola Oficina de Información Xuvenil (OMIX). Os interesados/as poden inscribirse a través do enderezo electrónico omix@concellodeames.org ou chamando ao teléfono 616 083 229.
No obradoiro, “Activando o teu futuro”, ofreceranse as ferramentas necesarias para motivar aos mozos e mozas á hora de buscar emprego ou de autoempregarse. Ademais analizaranse as oportunidades de traballo e a competitividade laboral e traballarase con estratexias que permitan aos mozos e mozas optimizar as súas habilidades e destrezas para a toma de decisións respecto o futuro ocupacional ou profesional.
A Oficina de Información Xuvenil (OMIX), dependente da concellaría de Xuventude, elixiu este obradoiro entre outros obradoiros que oferta o programa Activa 2014 por ser o Concello de Ames un dos concellos con máis mozos e mozas de Galicia. “Somos conscientes de que a nosa poboación máis nova ten que ter todos os paios posibles á hora de buscar o seu oco no mercado laboral”, manifesta o concelleiro de Xuventude, Bernardo Moar, quen agarda que as ferramentas que se lle ofrezan aos mozos e mozas no curso lles sirvan realmente para motivarse e a atopar máis facilmente traballo.
A encargada de impartir o obradoiro “Activando o teu futuro” será Sonia Sánchez Mella, dinamizadora da Dirección Xeral de Xuventude, que semanalmente colabora coa Radio Municipal de Ames a través do programa “Xuventude nas Ondas”, un espazo que ofrece información sobre as inciativas e axudas que a Dirección Xeral de Xuventude pon en marcha ao longo do ano e que se emite dentro da revista informativa “Somos Ames”, os mércores a partir das doce e media do mediodía.
O obradoiro está dirixido a mozos e mozas de 18 a 30 anos. De todos os xeitos calquera outra persoa que desexe afondar nas estratexias de busca de emprego pode asistir ao obradoiro, sabendo que os diplomas que avaliarán a participación unicamente se entregarán a quen non supere esa idade. Os interesados/as poden inscribirse a través do enderezo electrónico omix@concellodeames.org ou chamando ao teléfono 616 083 229.
Contido relacionado
El Correo Gallego: "Ames levará a cabo un obradoiro para axudar ós mozos na busca de emprego"