Nos próximos días vaise realizar unha auditoría dos parques infantís que consistirá nunha descrición do estado actual de cada un dos parques indicando as deficiencias detectadas conforme á normativa en vigor. Ademais, elaboraranse uns planos de situación de cada parque infantil; farase unha reportaxe fotográfica de cada parque e dos seus elementos; e determinarase a altura crítica da superficie amortiguadora mediante ensaio HIC. Por último, realizarase unha proposta para solucionar as deficiencias detectadas.

Segundo explica o concelleiro de Urbanismo e Obras Públicas, Blas García, “este estudo faise pola preocupación que ten o Goberno municipal pola seguridade dos nenos e das nenas que son usuarios/as destas instalacións municipais. Somos conscientes de que existen varios parques nun estado precario que é necesario melloralos e arranxalos”.

Paralelamente, dende a concellaría de Urbanismo e Obras Públicas estase traballando nun estudo para cubrir un parque infantil no Milladoiro e outro en Bertamiráns de cara a temporada de inverno. Blas García, indica que “estas instalación teñen un gran uso por parte de todos os nenos/as durante todo o ano, pero en inverno están mollados e nunhas condicións que non son as máis axeitadas para o seu uso. Debido a iso pretendemos cubrir dous parques para que os rapaces poidan facer uso deles tamén durante os meses de inverno”.

Por último, o Goberno municipal está elaborando un proxecto para construír un parque infantil accesible no que poidan xogar nenos e nenas con algún tipo de discapacidade funcional, así como o resto de rapaces e rapazas.

Contido relacionado

La Voz de Galicia: "Ames habilitará un parque infantil con juegos adaptados y dos recintos bajo cubierta"
El Correo Gallego: "Inspeccionarán los treinta y seis parques amienses para atajar sus deficiencias"