[06-02-2013] O Concello de Ames vén de reclamarlle a Fenosa que se acometa a mellora da rede eléctrica nas zonas de Covas, Ames, Tapia e Piñeiro. Deste xeito, o Concello transmitiulle á empresa distribuidora a preocupación dos veciños e veciñas destes lugares, que nas últimas datas veñen sufrindo numerosos cortes no subministro eléctrico.
Esta problemática foi unha das necesidades que lle transmitiron ao alcalde de Ames, Santiago Amor, os membros da Asociación de Veciños de Covas. Neste encontro, celebrado na Casa do Concello a pasada semana, os veciños e veciñas transmitíronlle ao rexedor e aos concelleiros os problemas que veñen rexistrando nas últimas datas co subministro eléctrico. Na reunión, o alcalde comprometeuse a trasladarlle estes cuestións a Fenosa e a reclamarlle que se leven a cabo as medidas necesarias para acadar a mellora da rede eléctrica.
No escrito remitido á empresa, o Concello expón que nas últimas datas rexistráronse varias queixas por parte de veciños das zonas de Ventosa, Covas, Ames, Tapia e Piñeiro ao respecto do funcionamento da rede eléctrica na zona. Concretamente, os veciños informan de numerosos cortes de luz e fallos no abastecemento eléctrico que dificultan un normal desenvolvemento nas súas actividades nos fogares afectados.
Por todas estas razóns, o Goberno amiense solicita que se proceda a facer un estudo da rede eléctrica e posterior mellora da mesma nestas zonas, de cara a optimizar a rede eléctrica e poder proporcionar un correcto servizo de abastecemento eléctrico.
Contido relacionado
La Voz de Galicia: "Ames traslada a Fenosa las quejas por deficiencias en la zona rural"
El Correo Gallego: "Ames trasládalle a Fenosa as reivindicacións de melloras na rede eléctrica dos veciños de varias zonas"