O Concello de Ames, xunto con outros 14 concellos, aprobaron o manifesto “Concellos contra o coronavirus” que promove no eido estatal a Confederación de Fondos de Cooperación e Solidariedade, da que forman parte nove fondos que representan máis de 1.300 administracións locais, entre eles o Fondo Galego de Cooperación e Solidariedade. O texto sostén que “nun contexto global, abandonar aos países do Sur non é unha opción” polo que unha vez superada a fase máis grave nos nosos territorios haberá que “axudar a outros pobos menos preparados para resistir os efectos da pandemia”.
Os concellos de Ames, Arteixo, O Barco, Bergondo, Cabanas, Cambados, Malpica, Moraña, Narón, Poio, Ponteareas, Sada, Sandiás, Silleda e Tomiño veñen de sumarse a esta declaración, mediante fórmulas como o acordo plenario, da Xunta de Goberno Local ou por Decreto de Alcaldía.
Ademais, a través da web da Confederación, numerosos cargos electos se adheriron tamén de xeito individual, co obxectivo de dar visibilidade ao apoio do municipalismo á cooperación internacional como instrumento necesario para responder ao desafío global xerado pola Covid19. Así, en xuño tamén se abrirán ás sinaturas da cidadanía en xeral, para promover a defensa deste tipo de políticas públicas municipais.
O manifesto recoñece que “se non actuamos globalmente, o risco de que o virus rebrote ou aparezan novas pandemias será cada vez maior” porque “vivimos nun mundo hiperconectado”. Neste senso, a actuación dos fondos de cooperación “non só se limita á resposta sanitaria inmediata”, senón que fai fincapé en fortalecer as capacidades locais dos países máis empobrecidos para xestionar servizos básicos que lles permitan afrontar calquera crise.
Campaña #OsMunicipiosCooperan
O Fondo Galego de Cooperación e Solidariedade puxo recentemente en marcha a campaña #OsMunicipiosCooperan, para poñer en valor a solidariedade internacional dende o ámbito local.
Asemade, o Fondo Galego de Cooperación e Solidariedade, en cuxa Xunta Directiva se encontra o Concello de Ames, ven de aprobar o investimento de 98.126 euros para frear o impacto do coronavirus en Mozambique e Guinea-Bissau, a través de cinco proxectos que inciden na sensibilización da veciñanza, a dotación de materiais de prevención, o abastecemento de auga ou a saúde da infancia.
O Fondo Galego de Cooperación
O Fondo Galego de Cooperación e Solidariedade está integrado por 98 concellos e as deputacións de Pontevedra, A Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Recoñecido como axencia municipal da cooperación galega, desde a súa fundación en 1997 o Fondo Galego ten desenvolvido máis de 150 proxectos en preto de 30 países e promove numerosas actividades e materiais en relación aos desequilibrios Norte-Sur.
Novas relacionadas:
Lindeiros: "Os concellos promoven un manifesto contra o Coronavirus"
