A pesar de que as reservas de abastecemento se atopan en situación de normalidade, os caudais dos ríos nesta época do ano continúan sendo baixos. As altas temperaturas e a falta de precipitacións que se están a rexistrar poderían levar a ter que aplicar medidas restritivas e correctoras de auga.

Co fin de evitar esa situación, o Concello de Ames lanzou, en colaboración con Espina & Delfín, esta campaña de sensibilización, que invita á veciñanza a adoptar unha serie de medidas, pautas e bos comportamentos para reducir o consumo de auga. A mensaxe de sensibilización difundiuse a través de carteis informativos que se colocaron nos edificios municipais, nas instalacións do servizo municipal de auga e nas redes sociais e páxinas web de ambas entidades.

Augaconsellos para a cidadanía
No ano 2022 o Concello xa lanzou unha campaña similar para reducir o consumo de auga na que se achegaron diversos “augaconsellos”, e que volven a recordarse este ano:

1. Ducharse en lugar de darse un baño
2. Empregar a lavadora e o lavalouzas con cargas completas
3. Limitar o enchido das piscinas
4. Non empregar o váter como papeleira
5. Racionar a auga para o rego
6. Optimizar o lavado dos vehículos
7. Revisar posibles fugas de auga
8. Pechar a billa para lavar os dentes
9. Limitar o baldeo e a limpeza das rúas

Dende o propio Concello tamén se adoptan unha serie de medidas para reducir o consumo de auga como son controlar e reducir o rego dos xardíns e das zonas verdes municipais públicas. Ademais, a empresa Urbaser, concesionaria do servizo municipal de limpeza viaria, reduce a cantidade de auga potable que gasta nos baldeos e servizos de limpeza que realiza polas rúas, beirarrúas e nas prazas municipais.

Novas relacionadas:

El Correo Gallego: "Ames llama al ahorro de agua 'porque se vén un setembro así de seco, pode haber problemas'"