Esta mañá presentouse unha nova edición deste festival de verán que pretende converterse nun referente dentro do panorama musical estival de Galicia. Esta iniciativa terá lugar os venres 3 e 10 de xullo nos xardíns do Pazo da Peregriana. Para poder desenvolver este festival o Concello de Ames conta coa colaboración da Rede Cultural da Deputación da Coruña e da Rede de Dinamización Lingüística da Xunta de Galicia.

O alcalde de Ames, José Miñones, a concelleira de Cultura, Luísa Feijóo, e tres dos artistas que actuarán neste festival: Xosé Manuel Budiño; Paco Nogueiras e Xoán Curiel, foron os encargados de facer a presentación da terceira edición deste festival. O rexedor municipal comezou dicindo que “o Pazo da Peregrina collerá durante a primeira quincena de xullo un festival de verán de grande calidade no que se darán cita artirtas de recoñecido prestixio”.

José Miñones destacou que a través deste evento musical preténdese “impulsar a cultura e a lingua galega, achegándolle á cidadanía amesá produtos culturais de calidade para todos os públicos. Ademais, vaise promover a participación de grupos emerxentes de distintos estilos de música en galego nun momento de enorme creatividade e calidade neste sector, sen esquecernos de artistas xa consolidados. Tamén se darán a coñecer outros estilos musicais, e outra forma de entender a música galaico-portuguesa, da man da artista María do Ceo”.

Por outra banda, Miñones, apuntou que “o noso obxectivo é encher ao Pazo da Peregrina de contido cultural con diefrentes actividade como exposicións ou festivais musicais co fin de dinamizar e dar a coñecer o patrimonio do Concello de Ames”. Por último, o alcalde fai un chamamento “á participación da cidadanía amesá nas actividades deste festival, de xeito que o público asistente teña un papel activo e non quede só en consumidor pasivo”.

Programa do festival de verán
O programa do festival de verán Encontros Culturais no Pazo 2015 comezará o vindeiro venres 3 de xullo, ás 20:30 horas coa actuación de Xoán Curiel e a banda Son+d2, que porán en escea o espectáculo Estamos no verán!!! Trátase dunha función moi completa con danza, música en directo e elementos de teatro, que se encadra no programa de dinamización lingüística FalaRedes 2015, que a Secretaría Xeral de Política Lingüística leva aos concellos da Rede de Dinamización Lingüística da Xunta de Galicia.

Este é un espectáculo que se caracteriza por facilitar a participación activa e constante do público asistente e por contar cunha banda de sobrada experiencia en proxectos infantís e xuvenís (batería-percusión, guitarra, teclados, ukelele, baixo eléctrico, dous cantantes-narradores e unha bailarina en escena) que interpretará cancións moi divertidas e tamén entrañables. É unha viaxe musical dende que soa o derradeiro timbre do cole en xuño ata o primeiro de setembro.

A actuación principal do primeiro día do festival será o concerto de Xosé Manuel Budiño, que comezará ás 22:30 horas, e no que presentará o seu último traballo: Sotaque, que foi gravado no seu estudio “Ardora” e mesturado e masterizado nos estudios “Atlântico Blue Studios de Lisboa”. Este traballo de composición propia reflexa a impronta da música tradicional e en especial da percusión galega, sempre tocada e pulida a man, xunto coa utilización da electrónica co acento característico de Budiño, co seu Sostaque. Trátase dun álbum conceptual onde as diferentes gaitas, percusións e voces galegas teñen a labor de marcar o ritmo ao longo de nove músicas compostas por Budiño máis unha peza tradicional, chea de sutileza e vitalidade.

O festival de verán Encontros Culturais no Pazo 2015 continuará a seguinte semana, o venres 10 de xullo. Nesta ocasión, a xornada comezará ás 20:30 horas coa actuación de Paco Nogueiras, que representará o espectáculo Brinca Vai! (de aquí a acolá). Nogueiras porá en encena unha función de música infantil cos ritmos máis diversos (electrónica, pop, folk, reggae, rock). Brinca Vai! De aquí a acolá é un espectáculo baseado no libro-CD-DVD “Brinca Vai!”, editado por Kalandraka Editora, no que se combinan cancións, animacións e interpretacións cos ritmos e rexistros máis divertidos.

A segunda xornada deste festival pecharase, ás 22:30 horas, cun concerto da gran fadista portuguesa María do Ceo, que actualmente xa está considerada como a sucesora de Amalia Rodrigues, tanto no estilo, como na interpretación. Esta artista interpretará algúns dos seus temas máis coñecidos, fados tradicionais e algunha composición feita especificamente para ela. Destacan interpretacións como a da canción María la portuguesa, coñecido tema de Carlos Cano, cantado nunha versión en portugués que emocionou ao escoitala á propia viúva do falecido cantante andaluz. Os excepcionais músicos que a acompañan nos seus concertos, dan forma a un espectáculo de gran calidade musical que destaca polos seus matices, sensibilidade, e a sempre doce voz de María do Ceo, onde entenderemos de inmediato a identidade cultural luso-galaica.

Contido relacionado

La Voz de Galicia: "Budiño, Curiel, María do Ceo y Nogueiras, en los Encontros Culturais de Bertamiráns"
El Correo Gallego: "María do Ceo, Budiño e Curiel para os III Encontros Culturais de Ames"