[23-08-2011] As escolas de verán de Bertamiráns e Milladoiro acolleron este luns 22 de agosto a celebración da campaña “Ponlle as pilas ao teu bocata” xestionada pola Consellería do Mar da Xunta de Galicia, en colaboración coas Consellerías de Educación e Extensión Universitaria, Sanidade e a agrupación empresarial ANFACO-CECOPESCA. Esta campaña pretende achegar aos nenos e nenas da comunidade autónoma toda a información relacionada cos produtos do mar, coas conservas e coa correcta alimentación. A Escola de Verán de Bertamiráns recibiu aos organizadores da campaña este luns en horario de 10:00 h. a 11:00 horas da mañá, mentres que Escola de Verán do Milladoiro acolleu esta iniciativa entre as 12:30 h. e as 13:30 horas. O concelleiro de Educación, Alfonso Rey, comprometido coa importancia de incentivar o consumo de produtos do mar entre os pequenos e pequenas amienses para unha correcta alimentación, acudiu ás escolas de verán do Concello de Ames coa intención de mostrar compromiso con estas iniciativas de especial relevancia para a saúde dos rapaces. Ademais, o concelleiro de Promoción Económica, Bernardo Moar, achegouse tamén ata as instalacións deportivas do Milladoiro para observar de preto esta campaña de promoción dos produtos do mar.
Debido a todas as funcións beneficiosas que os produtos do mar teñen no corpo humano e a súa función principal como benefactor dun correcto crecemento e desenvolvemento de osos, tecidos e órganos, dende a Consellería de Mar preténdese impulsar o consumo destes produtos para todo a poboación galega pero, sobre todo, para os nenos e nenas que precisan dunha boa alimentación para crecer dun xeito o máis saudable posible. O escaso consumo de peixe entre os máis pequenos é preocupante polo que a Xunta de Galicia e os concellos galegos apostan polo establecemento destas campañas de promoción para incidir na necesidade de que os cativos e cativas galegos consuman alimentos que proveñen do mar para unha correcta dieta alimentaria.
Os produtos do mar, bos amigos para o crecemento dos rapaces
Os produtos que proveñen do mar son alimentos ricos en proteínas, materia graxa, vitaminas e sales minerais e se converten nun dos recursos alimentarios máis importantes por iso é conveniente que estes alimentos estean incluídos nas dietas dos rapaces e rapazas. O seu consumo resulta imprescindible para o desenvolvemento do corpo e o seu mellor funcionamento. En canto aos beneficios que aportan os produtos do mar, xa sexa polos seus valores vitamínicos ou minerais, destaca o seu labor de mineralizador dos osos, de instrumento de desenvolvemento do sistema nervioso e do crecemento corporal, de ordenador do desenvolvemento humano ao regular a síntese da hormona tiroidea, de mecanismo de transformación da materia graxa en enerxía e de regulador do sistema inmunolóxico.
A campaña "Ponlle as pilas ao teu bocata" vense desenvolvendo xa dende o curso escolar 2010-2011 e xa foi posta en marcha en máis de 40 colexios públicos galegos. Arredor de 2.000 escolares puideron gozar dos coñecementos relacionados coa boa alimentación e do fomento dos produtos do mar nos rapaces e rapazas con idades comprendidas entre infantil e xuvenil debido, principalmente, ao escaso consumo e interese polo peixe nas súas dietas alimenticias. O remate do curso escolar non supuxo o fin de esta campaña que, arestora, se desenvolve dentro dos campamentos urbanos e das competicións deportivas organizadas polos concellos coa finalidade de seguir facendo fincapé nos beneficios dos produtos do mar.
A iniciativa consiste na realización dun obradoiro lúdico que os motive no consumo de produtos do mar en conservas, o seu interese polos peixes. Os nenos e nenas amienses dispuxeron de actividades informativas, xogos e, sobre todo, unha actividade de elaboración de bocatas a base de conservas.
Os nenos e nenas de Bertamiráns e Milladoiro contaron cunha explicación divertida sobre as bondades dunha dieta equilibrada que pretende incluír aos produtos do mar nas súas vidas. Tras unha breve reflexión sobre os alimentos que os rapaces deben consumir para ter unha boa alimentación e sobre os produtos do mar en conserva, as monitoras quixeron levar a teoría á praxe e que mellor forma de facelo que mediante un xogo. Un xogo do máis entretido onde cativos e cativas amienses experimentaron o labor dos mariñeiros dende o peirao ata o barco de pesca e posteriormente convertéronse en verdadeiros expertos nos produtos do mar mediante a clasificación dos peixes e mariscos da comunidade galega e a defensa do medio mariño. A aventura "Do mar á túa lata, e da lata ao teu bocata" non rematou aí, tras a pesca e a conservación só falta que o peixe chegue ao consumidor. Nesta último ciclo da cadea alimenticia os rapaces realizaron os seus propios bocatas onde o atún, as xoubas e os mexillóns pasaron a ser os elementos imprescindibles dos aperitivos dos máis pequenos.
Contido relacionado
La Voz de Galicia: "Los niños amienses aprenden a disfrutar del pescado en lata"