[15-03-2014] O Concello de Ames, a través da Oficina Municipal de Información Xuvenil (OMIX), puxo en marcha o programa de reforzo educativo e técnicas de estudo, que está dirixido aos rapaces e rapazas de Ames. Esta actividade está destinada ao alumnado que está cursando a Ensinanza Secundaria Obrigatoria nos centros educativos de Bertamiráns e do Milladoiro. Deste xeito, ofréceselle a posibilidade a todos os rapaces e rapazas de complementar os seus estudos con clases de apoio encamiñadas a potenciar o rendemento académico do alumnado. As clases comezaron esta semana e desenvolveranse ata o vindeiro 29 de maio, en horario de 16:30 h a 18:30 horas, tanto no IES do Milladoiro (os mércores) como no IES de Ames, en Bertamiráns (os xoves). O concelleiro de Xuventude, Bernardo Moar, asistiu á primeira xornada desta actividade para animar aos rapaces e rapazas a que aproveiten estas clases de reforzo.
O Concello de Ames acaba de poñer en marcha un programa educativo para reducir o abandono escolar. A través desta iniciativa preténdese favorecer o desenvolvemento de actividades que lle proporcionen unha formación integral ao alumnado e, ao mesmo tempo, promover o esforzo compartido de toda a comunidade educativa na procura do éxito escolar e na redución do abandono temperán dos estudos por parte da nosa mocidade. Procurarase, xa que logo, diminuír o impacto dos factores que inciden no abandono do sistema educativo por parte do alumnado amiense sen obter a titulación de educación secundaria obrigatoria.
O servizo de reforzo educativo está dirixido ao alumnado de 1º e 2º de ESO, dividindo a docencia en dúas áreas: ciencias e letras. O plantexamento destas clases estructúrase segundo o método de “aprender facendo” e non como unha extensión das clases regulares. Trátase de fomentar a comprensión das ideas mediante a práctica dos contidos traballados na aula, dirixidas a completar lagoas de coñecemento ou repasar contidos concretos traballados en clase (reforzo) ou ben naqueles casos nos que as necesidades do alumnado o requira dirixirase á recuperación de destrezas básicas instrumentais que imposibilitan ao alumnado seguir o desenvolvemento ordinario das clases.
A finalidade destas clases de reforzo é a de orientar a aprendizaxe do alumnado para que se sintan protagonistas da construción do seu coñecemento. O servizo de reforzo educativo impartirase nos dous institutos de Ames, que se atopan en Bertamiráns e no Milladoiro. No IES do Milladoiro as clases impartense todos os mércores. En horario de 16.30 h a 17.30 horas impártese as áreas de letras para o alumnado de 1º de ESO e de ciencias para os alumnos/as de 2º de ESO. Ademais, os mércores tamén se imparte, de 17.30 h a 18.30 horas, as modalidades de ciencias para o alumnado de 1º de ESO e letras para os alumnos/as de 2º ESO.
Por outra banda no IES de Bertamiráns este servizo realízase todos os xoves. As áreas de letras para 1º de ESO e ciencias para 2º de ESO impártese en horario de 16.30 h a 17.30 horas, mentres que as modalidades de ciencias para o alumnado de 1º ESO e letras para os alumnos/as de 2º ESO impártense de 17.30 h a 18.30horas.
Servizo de técnicas de estudio
O servizo de técnicas de estudio está dirixido ao alumnado de 3º e 4º da ESO e procura como finalidade xeral establecer as competencias básicas a través das cales estes poidan xestionar autónomamente as destrezas necesarias no contexto do seu proceso de aprendizaxe. É dicir, o curso persegue establecer os cimentos operacionais primarios para que eles diacrónicamente e mediante un exercicio continuado e constante poidan alcanzar os seus obxectivos académicos. Polo que a finalidade xeral do curso é establecer a autonomía habitual do alumnado respecto das súas tarefas escolares.
A través deste servizo trabállase co alumnado conceptos como o da motivación, o deseño dun organigrama de estudo, as técnicas de sistematización do coñecemento (mapas conceptuais, esquemas, resumes), a importancia do vocabulario e da memoria. As clases deste servizo desenvolveranse os mércores no IES de Milladoiro e os xoves no IES de Ames, en Bertamiráns, entre as 16.30 h e as 18.30 horas, dende o 12 de marzo ata o 29 de maio (agás festivos).
Para este servizo municipal (tanto para o programa de reforzo educativo coma para técnicas de estudo) ofértanse un total de 136 prazas (68 prazas para cada centro de ensino). Na actualidade están cubertas un total de 81 prazas (59 en Bertamiráns e 22 no Milladoiro), polo que quedan aínda libres 55 prazas. A maioría das prazas libres están dispoñibles para o alumnado do IES do Milladoiro, xa que este servizo tivo unha maior demanda no IES de Ames, situado en Bertamiráns. Os propoios centros educativos son os encargados de derivar ao alumnado que segundo as súas particularidades ou necesidades formativas, teñan unha maior necesidade en participar nestas clases, sempre que se conte coa autorización familiar do alumno/a.
Impresos de inscrición
As follas de inscrición están dispoñibles para o alumnado interesado nos propios IES, que se encargan do seu reparto e da súa posterior recollida. Ademais, o impreso de inscrición poderase recoller na Oficina Municipal de Información Xuvenil (OMIX), situada na Casa da Cultura de Bertamiráns (os luns, mércores e xoves) e no Punto de Información Xuvenil (PIX) da Casa da Cultura do Milladoiro (os martes e venres).