[30-05-2016] O concelleiro de Educación e Cultura, David Santomil, asistiu o sábado pasado á I Xornada sobre comedores escolares, que foi organizada pola confederación de ANPAS galegas e a Federación de ANPAS Compostela no Centro de Estudos Avanzados, situado no parque de Vista Alegre, en Santiago. A través desta iniciativa pretendeuse crear debate sobre o modelo de xestión dos comedores escolares nos concellos galegos. Santomil participou nunha mesa redonda para falar do modelo de xestión da Rede municipal de comedores do Concello de Ames, que son unha referencia nesta materia en toda Galicia.
A Rede Municipal de Comedores Escolares de Ames, incluída na oferta de servizos complementarios do Concello, ten como principal obxectivo conciliar a vida familiar e laboral de todos os veciños e veciñas de Ames. O Concello xestiona directamente este servizo que está dirixido ao alumnado de infantil e primaria. Actualmente a Rede conta con cinco comedores no CEIP Agro do Muíño, no CEIP A Maía, no CEIP de Barouta, no CEP de Ventín e na Escola de Educación Infantil do Milladoiro.
Santomil participou nunha mesa redonda xunto coa moderadora e xornalista Ainhoa Apestegui, que pertence á ANPA Raíña Fabiola. Ademais do edil amesán, interviron Maribel Pérez, coordinadora dos monitores dos CEIPs de Ferrol, que falou do comedor escolar como espazo educativo; Manuel Cid, concelleiro de educación de Allariz, que tratou o modelo de xestión deste concello ourensán, e Javier Sánchez, presidente da Confederación de ANPAS galegas, falou do modelo de comedores para Galicia.
Cada persoa que participou nesta mesa redonda dispuxo de 10 minutos para facer a súa exposición e despois abriuse un tempo para o debate. Na súa intervención, o concelleiro de Educación e Cultura do Concello de Ames, falou do modelo de xestión da Rede municipal de comedores de Ames, que é en moitos casos é unha referencia para outros concellos de Galicia. Asemade, explicou a xestión do persoal que se fai, dos provedores locais, ratios alumnado, servizo de monitores, equipamentos, modelo educativo, asesoramento da nutricionista municipal e casos de intolerancias alimenticias entre outros aspectos.
David Santomil explica que “con este programa realízase por unha parte un servizo público, facilitando aos cidadáns a conciliación da vida laboral e familiar e por outra, un proxecto educativo no que o obxectivo é que o alumnado aprenda hábitos alimentario sans e un correcto comportamento na mesa, así como as normas básicas de hixiene, respecto, tolerancia, convivencia e educación en igualdade”.
Durante este curso 2015-2016 están facendo uso deste servizo uns 1.113 rapaces e rapazas que cursan estudos de educación infantil e primaria. Para atender este servizo o Concello de Ames dispón dunha técnica en nutrición e dietética que é a encargada da elaboración dos menús que se serven nos comedores municipais e das intolerancias. A elaboración dos menús faise semanalmente de xeito que non se repiten e á vez empréganse ao máximo os produtos de tempada. Ademais, esta técnica encárgase de atender os casos de tratamentos alimentarios especiais.
Contido relacionado
El Correo Gallego: "Ames, exemplo de xestión con máis de 1.110 usuarios nos comedores escolares"
La Voz de Galicia: "ANPAS Galegas defiende que la Xunta gestione los comedores escolares"