A realización desta xornada sobre mobilidade busca reflexionar e contrastar propostas concretas sobre experiencias vinculadas á mobilidade urbana e á conectividade entre diferentes núcleos de poboación metropolitanos, como é o caso do concello de Ames. A mobilidade sustentable é un dos obxectivos temáticos das estratexias de desenvolvemento urbano de toda Europa, e en Galicia, pola elevada dispersión dos núcleos de poboación, cobra unha especial relevancia. Esta iniciativa de comunicación enmárcase dentro da EDUSI Impulsa Ames, cofinanciada mediante o Programa Operativo FEDER de Crecemento Sustentable 2014-2020.

Esta xornada de traballo está dirixida, en primeiro lugar, á cidadanía do municipio de Ames, que forma parte da necesaria dinamización e participación social na procura de solucións eficientes e eficaces. En segundo lugar, a xornada está aberta á participación de técnicos urbanísticos, profesionais da mobilidade e arquitectos, así como a calquera persoa interesada na temática que se vai tratar. Esta xornada desenvolverase o mércores, 25 de abril, na Casa da Cultura do Milladoiro. Para inscribirse hai que enviar un correo electrónico ao enderezo jornada.movilidad@ames2020.gal

A devandita xornada comezará ás 10:00 horas co acto de inauguración que correrá a cargo do alcalde, José Miñones, e dun representante da Dirección Xeral de Fondos Comunitarios. De seguido, ás 10:30 horas, haberá unha mesa institucional para falar da mobilidade no sistema urbano galego, na que participará Valentín González Formoso, presidente da Deputación da Coruña; José Blanco, membro do Parlamento Europeo; e un representante da Federación Española de Municipios e Provincias (FEMP). Ás 11:15h realizarase un relatorio sobre a mobilidade en trasporte público en áreas metropolitanas, no que intervirán Julián Sastre, presidente do Instituto de la Movilidad; e Rosa Arce, directora do Centro de Investigación del Transporte (TRANSyT).

Mobilidade na área metropolitana de Santiago
Tras unha pausa de descanso, ás 12:45 horas, desenvolverase unha mesa redonda sobre a mobilidade na área metropolitana de Santiago. Neste mesa tamén se abordarán os problemas de mobilidade na área de Compostela, así como a experiencia en cada un dos municipios. Intervirán o alcalde de Ames, José Miñones; o concelleiro de Mobilidade do Concello de Santiago de Compostela, Jorge Duarte; a concelleira de Transporte do Concello de Teo, Concepción García; o alcalde do Concello de Oroso, Manuel Mirás; e mailo alcalde do Concello de Brión, José Luís García. As actividades da mañá rematarán cunha rolda de preguntas tras a realización de dita mesa redonda.

Pola tarde, ás 17:00 horas, haberá outra mesa redonda. Neste caso abordarase a mobilidade urbana sustentable, os retos e os desafíos. O moderador será Esteban López, experto en mobilidade. Participarán Xavier Pont, coordinador de proxectos da Área de Urbanismo e Mobilidade da Axencia de Ecología Urbana de Barcelona; David Alvárez, consultor de Afora Tráfico y Transporte; e Manuel Márquez, xefe do Servizo de Planificación e Explotación da Dirección Xeral de Mobilidade da Junta de Andalucía. Ao remate desta mesa haberá unha rolda de preguntas e pecharase a xornada.

A mellora da mobilidade e conectividade será un dos investimentos de maior calado cun plan de transporte público entre O Milladoiro e Bertamiráns complementado con transporte baixo demanda. A xornada que se vai a realizar a próxima semana enmárcase no traballo que hai que realizar neste eido que é un dos catro grandes obxectivos incluídos na Estratexia DUSI Impulsa Ames.

Contido relacionado:

Compostela 24 Horas: "El Concello de Ames organiza una jornada sobre la movilidad sostenible en estrategias urbanas integradas que se enmarca dentro del plan "Impulsa Ames" de la EDUSI"
Lindeiros: "Ames organiza unha Xornada sobre mobilidade sustentable"
El Correo Gallego: "Plazo para el presupuesto participativo amiense y el foro de movilidad Impulsa"