Os veciños e veciñas amienses poderán coñecer máis polo miúdo a vida e obra de Rosalía de Castro a través da visita á Casa Museo de Rosalía de Castro, que organizou o Concello de Ames para o próximo sábado 22 de febreiro. Para iso, porase á disposición da veciñanza amiense un autobús que saíra as 11:00 horas do Milladoiro e a continuación, ás 11:15 horas pasará por Bertamiráns, para recoller a todas as persoas que se inscriban nesta visita.

Os participantes irán en autobús ata a Casa Museo de Rosalía de Castro que se atopa en Padrón. Unha vez alí, os veciños e veciñas que participen nesta actividade recibirán unha explicación sobre a vida e a obra da escritora galega. Está previsto que a visita remate ás 14:00 horas. Cada participante terá que pagar a súa entrada para visitar a Casa Museo, que ten un custo de 1,20 euros. O custo do autobús corre a cargo do Concello de Ames.

Esta actividade enmárcase dentro da programación que organizou o Concello para conmemorar o Día de Rosalía, que se conmemora cada 24 de febreiro, coincidindo co aniversario do nacemento da escritora galega. A programación de actividades continuará o domingo 23 de febreiro cun acto literario-musical.

Todos os veciños e veciñas de Ames que desexen participar nesta visita poderán inscribirse ata o 19 de febreiro na Casa da Cultura do Milladoiro ou no Pazo da Peregrina en Bertamiráns, en horario de 09:00 a 14:00 horas. Hai dispoñibles 55 prazas que se cubrirán por rigorosa orde de inscrición. Terán preferencia as persoas que estean empadroadas no Concello de Ames.