[23-05-2018] “Resolver dificultades na demencia” é o título da primeira das charlas que o Concello de Ames organiza a través do servizo de Axuda no Fogar. A charla, que será impartida pola neuropsicóloga María Lueiro, será a primeira dunha serie de conferencias que tentarán ofrecer técnicas e mecanismos de apoio ás persoas coidadoras. A charla desenvolverase tanto no Milladoiro como en Bertamiráns. Na primeira localidade, o taller realizarase o 28 de maio, ás 18:30 horas, na Casa da Cultura, mentres que en Bertamiráns terá lugar o día 31, ás 19:00 horas, no Pazo da Peregrina. Este novo ciclo de charlas conta coa colaboración de Atendo Dependencia, empresa adxudicataria do servizo de Axuda no Fogar de Ames.
Cando unha persoa ten demencia, as dificultades aumentan no seo familiar, xa que se producen numerosas situacións que de primeiras poden desbordar a quen as viven. A charla “Resolver dificultades na demencia” procura, por este motivo, ofrecer unha serie de ferramentas coas que as persoas coidadoras consigan lidar con este tipo de situacións, que se poden producir debido á existencia de problemas de conduta, a unha mobilidade reducida, aos trastornos do sono...
A charla procura ser, polo tanto, un espazo de encontro entre persoas formadas neste eido e persoas que non o están, mais que teñen que coidar de familiares con demencia. Impartida pola neuropsicóloga e directora do Centro de Día de Santiago de Compostela, María Lueiro, a charla procurará adaptarse ao perfil de usuarias e usuarios do servizo de Axuda no Fogar do Concello de Ames.
O taller “Resolver dificultades na demencia” desenvolverase tanto no Milladoiro como en Bertamiráns. Na primeira das localidades, a charla realizarase na Casa da Cultura, o 28 de maio, ás 18:30 horas. En Bertamiráns, pola súa banda, o taller terá lugar no Pazo da Peregrina, o día 30, ás 19:00 horas. Dentro deste programa impartiranse outras charlas ao longo do ano, que serán de interese para coidadores de persoas dependentes e persoas que teñan algún tipo de dependencia.
