O Concello de Ames volve a organizar unha excursión a Portugal, que se desenvolverá o próximo sábado 2 de maio. Deste xeito, os veciños e veciñas do concello poderán achegarse ata Vilanova de Cerveira e Valença do Minho para coñecer estas dúas localidades lusas e gozar da feira. Esta actividade, que está dirixida ás persoas que estean empadroadas no Concello de Ames, ten o obxectivo de que a veciñanza amiense poida gozar dunha visita cultural e lúdica a Portugal.

A excursión comezará ás 9:00 horas da mañá do sábado 2 de maio coa saída desde Bertamiráns e desde O Milladoiro. Ás 10:00 da mañá está prevista a chegada a Tui, onde se fará unha parada para almorzar. Ás 10:30 horas retomarase a viaxe cara Vilanova de Cerveira, a onde está previsto a chegada arredor das 11:00 horas. Os/as asistentes terán tempo de visitar a localidade e a feira que se celebra cada sábado ata as 14:00 horas, xa que a esa hora realizarase o xantar. Trala comida haberá unha sesión de baile.

Á tarde realizarase a saída en autobús cara a Valença do Minho, a onde está previsto chegar ás 17:00. Ata ás 19:00 horas, as persoas que participen na excursión terán tempo libre para visitar a Fortaleza e o tradicional mercado dos sábados. Ás 19:00 horas, a veciñanza amiense volverá cara Ames, onde se chegará arredor das 20:30 horas.

Todos os veciños e veciñas de Ames que desexen participar nesta excursión poderán anotarse ata o 30 de abril. Para apuntarse hai que chamar, de 9:00 a 14:00 horas, ao número de teléfono 662 377 044 ou 662 377 302. Hai dispoñibles un total de 150 prazas, que se cubrirán por rigorosa orde de inscrición. A actividade custa 25 euros. Este prezo inclúe o custo do autobús, almorzo e xantar/baile.