Pestanas principais

O Concello de Ames ofrece o servizo de transporte adaptado para as eleccións xerais do 10 de novembro

Martes, 05 de novembro de 2019

O Concello de Ames pon á disposición das persoas con dificultades de mobilidade un vehículo especialmente habilitado para que poidan participar nas eleccións xerais que se celebran este domingo, 10 de novembro. As persoas interesadas deberán poñerse en contacto cos encargados da xestión do transporte chamando ao teléfono gratuíto 900 204 000, en horario de 9:00 h a 14:00 horas, ata o xoves 7 de novembro, para facer a reserva do servizo. O transporte adaptado ofrece o servizo de recollida no seu domicilio, transporte ata a mesa electoral e regreso ao seu domicilio.

O Concello de Ames dispón dun vehículo especialmente habilitado para o transporte de persoas con minusvalía física e que se atopará o próximo domingo, 10 de novembro, a disposición de todos os veciños e veciñas de Ames para facilitar o exercicio do dereito ao voto. Este vehículo dispón de nove prazas para persoas sentadas e dúas prazas para cadeiras de rodas. Polo tanto o microbús do servizo de transporte adaptado municipal dispón dun total de once prazas. O vehículo complétase coa condutora e a auxiliar de transporte que axuda a todas as persoas usuarias a subir e baixar do vehículo.

As persoas interesadas deberán poñerse en contacto cos encargados da xestión do transporte chamando ao teléfono gratuíto 900 204 000. Para facer a reserva do servizo haberá que chamar ata o xoves 7 de novembro, en horario de 9:00 h a 14:00 horas. Deste xeito todas as persoas que sufran algún tipo de minusvalía disporán dun servizo de recollida no seu domicilio, transporte ata a mesa electoral e regreso ao seu domicilio.

Con este servizo preténdese unha vez máis facilitar a vida diaria e o exercicio de dereitos, neste caso do dereito democrático ao voto, a todos aqueles veciños e veciñas afectados por unha minusvalía física que lles impide o seu desprazamento en vehículo propio ou transporte público non adaptado.

transporte adaptado