[19-07-2012] O Concello de Ames está ofrecendo o servizo de bibliopiscinas nas piscinas descubertas do Milladoiro e Bertamiráns, e na área recreativa de Tapia. A través desta iniciativa lévase a lectura e outros servizos da Biblioteca aos lugares de ocio de todo o municipio. Este servizo é unha iniciativa da Biblioteca municipal que, baixo o lema Móllate na lectura, 2012!, pretende achegar os seus servizos tradicionais, levando os libros, os xogos, os xoguetes e varias actividades a estas áreas. As actividades desenvolveranse ata o vindeiro 31 de agosto.
A pesar de que durante as primeiras semanas de xullo o tempo non acompañou demasiado, o Concello de Ames, a través da Concellería de Educación, está ofrecendo o servizo de bibliopiscinas nas principais áreas de ocio do municipio. Debido ao bo tempo que estamos tendo esta semana, a afluencia de nenos/as que se achegaron ás casetas das bibliopiscinas incrementouse significativamente.
A través desta iniciativa trátase de facer máis divertidas as tardes de sol para pais, nais e fillos/as. Os pais e nais poden gozar dos servizos de lectura de prensa, lectura dentro do recinto, préstamo de libros a toallas e a domicilio, mentres que os máis pequenos teñen tempo para gozar con xogos para todas as idades. A campaña das bibliopiscinas comezou o día 2 de xullo e prolongarase ata o vindeiro 31 de agosto.
Todos/as coñecemos a importancia de medrar coa lectura e, por esta razón, o Concello impulsa iniciativas coma esta das bibliopiscinas, para que os nenos poidan asociar a lectura non só coas horas de estudo senón tamén co tempo de lecer. Os expertos coinciden en que é importante que os nenos e nenas non perdan o hábito de estudo nas vacacións, xa que logo lles resultará máis complicado a volta á rutina escolar. Pero non debemos esquecer que eles, ao igual que todos, necesitan descansar e desenvolver actividades lúdicas e motivadoras.
A hora do conto
Para esquecerse da rutina do curso e dos estudos os rapaces e rapazas poden gozar de contacontos. Todas as tardes levarase a cabo a hora do conto. Ás 18:00 horas, os monitores encargaranse de ler diversos contos. Ademais, durante esta hora os pais e nais poderán aproveitar para darlle a merenda aos fillos. As actividades estrelas será os contacontos ou obradoiros que se desenvolven todos os mércores, ás 18:00 horas, en cada unha das áreas de baño: Milladoiro, Tapia e Bertamiráns.
Este servizo está dirixido a todo o público sendo unicamente requisito contar cun carné municipal para poder acceder aos servizos de préstamo de libros a toalla e a domicilio. Todos os demais servizos son de acceso libre. As bibliopiscinas están abertas ao público nos meses de xullo e agosto. En Bertamiráns e no Milladoiro o horario é de luns a venres de 16:00 h. a 20:00 horas. As fins de semana e os festivos están pechadas.
Na praia fluvial de Tapia o horario é o mesmo, dende as 16:00 h. ás 20:00 horas, pero de luns a sábado. Ademais, está aberto os días festivos. En canto á biblioteca municipal, está aberta nos meses de verán en horario das 10:00 h. ás 14:00 horas. En caso de mal tempo, as bibliopiscinas poden pechar, aínda que a persoa encargada de cada unha estará alí.
Calquera piscina esperta unha gran fascinación para os nenos e nenas e a campaña das bibliopiscinas Móllate na lectura, 2012! axúdalle a pais e nais á conciliación da vida familiar durante o verán. Simplemente é unha axuda para que os días na piscina en Ames sexan inesquecibles.
