[24-06-2013] No próximo curso, as escolas deportivas municipais de Ames ofertarán catro novas actividades: bádminton, judo, ballet e ximnasia rítmica e aumentarase a oferta deportiva destinada ás nenas. Así se contempla no programa deportivo mínimo incluído no expediente de contratación do servizo de realización de actividades das escolas deportivas do Concello de Ames, que foi aprobado pola Xunta de Goberno Local.
Con este proceso de contratación, a Concellería de Deportes busca darlle continuidade á prestación dun servizo que leva anos realizando, como é o das escolas deportivas municipais e das actividades físicas para persoas adultas. Como novidade, incluíranse para o próximo curso actividades deportivas novas, como o bádminton, judo, ballet ou ximnasia rítmica. O obxectivo das actividades programadas nas escolas deportivas é promover o benestar físico, psicolóxico e social da poboación amiense.
O valor anual estimado deste contrato, que comezará no mes de outubro de 2013, ascende a 155.301,42 euros e a súa duración inicial é de dúas tempadas, susceptible de ser prorrogada por outras dúas máis. Por iso, o importe total estimado do contrato ascende a 621.208 euros. O anuncio deste proceso de licitación será publicado no Boletín Oficial da Provincia da Coruña e no perfil do contratante da web municipal para que durante o prazo de quince días os interesados poidan presentar as súas proposicións.
No prego do expediente de contratación establecese un programa deportivo mínimo, que será de 142 horas semanais ao que se deberá engadir como mínimo 100 horas nos meses de xullo e agosto. Este programa deportivo mínimo divídese en tres categorías: escolas deportivas, actividade física para adultos e natación de verán.
No apartado de escolas deportivas fíxanse as actividades deportivas mínimas que se deberán ofrecer. Trátase de predeporte (para nenos/as de 3 a 5 anos), patinaxe (a partir de 6 anos), tenis (a partir de 6 anos), baloncesto (de 6 anos en adiante), tenis de mesa (desde 6 anos) e natación (en idades de 3 a 5 anos). Como novidades, introdúcense disciplinas como o bádminton, judo, ballet e ximnasia rítmica.
Ximnasia de mantemento e natación
No campo de actividade física para adultos, inclúese a ximnasia de mantemento en Bertamiráns e Milladoiro, a ximnasia de mantemento no rural (en Trasmonte, Covas, Aldea Nova, Augapesada, Ameixenda e Biduído), aeróbic, pilates, spinning, abdominais e glúteos. Ademais, no programa deportivo básico inclúese a actividade de natación de verán, con 100 horas ao mes en xullo e agosto.