No Milladoiro, executáronse obras por valor de 115.500 euros, realizadas directamente con persoal propio de Augas de Ames. Entre as actuacións máis destacadas atópanse a corrección das conexións incorrectas de baixantes pluviais, a renovación de tramos da rede de saneamento deteriorados, melloras na rede de abastecemento mediante a instalación de novas válvulas e cruces de rede, así como a colocación de novas bocas de rega na zona humanizada da N-550. Estas actuacións permitiron reducir o risco de inundacións, optimizar o funcionamento das redes e facilitar o mantemento dos espazos públicos.

O alcalde de Ames e presidente da empresa pública, Blas García, sinala que a EPEL naceu para isto, para reinvestir o beneficio da prestación do servizo da auga no propio concello: ”Este importe que Augas de Ames vén de destinar a estas actuacións sería parte do beneficio dunha empresa privada se non houbésemos municipalizado esta prestación. A seguinte gran actuación a levar a cabo é a desconexión do Milladoiro da rede de abastecemento de Santiago e conectala á de Ames, o que nos permitirá aforrar arredor de 40.000 euros ao mes”.

No mesmo senso o concelleiro de Obras e Servizos Básicos, Gustavo Nieto, explicou que estas actuacións suporán unha mellora importante para o núcleo máis grande do concello pois “coa instalación antiga, ante calquera incidencia era necesario cortar a auga en todo O Milladoiro; agora somos capaces de sectorizar a rede, minimizar o impacto e reducir de xeito significativo as molestias á veciñanza”. 

O Concello de Ames, a través da súa entidade pública Augas de Ames EPEL, realizou contratacións públicas para a realización de investimentos na rede (CIA) que supuxeron un importe de 277.582,34 euros, dos cales 203.354,35 euros corresponderon a actuacións realizadas mediante contratos menores e 74.227,99 euros a unha obra executada por licitación pública no núcleo de Ventín.

Durante o ano 2025 leváronse a cabo reparacións e substitucións de colectores de saneamento e pluviais, instalación de novos sumidoiros e melloras na drenaxe urbana en distintos puntos do termo municipal.

Especial relevancia tivo a obra realizada en Ventín, que permitiu a instalación dunha tubaxe de pluviais de gran diámetro, mellorando notablemente a evacuación das augas de choiva e reducindo os episodios de inundación, cun impacto positivo tanto para a veciñanza como para a contorna do colexio da zona.

O conxunto destas actuacións tradúcese en importantes beneficios para a cidadanía, como a mellora da seguridade sanitaria e ambiental, a redución das inundacións, unha maior fiabilidade das redes, menor impacto das avarías e a modernización xeral das infraestruturas hidráulicas municipais.

Dende Augas de Ames, a xerente Genma Otero destacou que “este investimento supón unha actuación estratéxica que contribúe a consolidar un sistema de saneamento e abastecemento máis eficiente, sostible e preparado para dar resposta ás necesidades actuais e futuras do municipio de Ames”.

Novas relacionadas

El Correo Gallego: "Ames minimiza o impacto dos cortes de auga no Milladoiro"

La Voz de Galicia: "Ames invirtió 393.000 euros en la red de agua, buena parte en O Milladoiro"

Xornal de Compostela: "Ames investiu máis de 393.000 euros na mellora das redes de auga, saneamento e drenaxe ao longo de 2025"