[05-03-2015] O alcalde de Ames, Santiago Amor, e o concelleiro de Obras, Alfredo Taboada, achegáronse onte ata a Travesía do Pedregal, en Bertamiráns, para comprobar o estado dos traballos que se están executando nesta zona. Con estas actuacións reorganizarase o tráfico e crearanse novas prazas de aparcamento na contorna do centro de saúde e da casa da cultura. Tamén se reparará a Travesía de Lodeiro e habilitarase un novo aparcadoiro nunha parcela municipal que está detrás do centro de saúde. O importe total destes proxectos é duns 112.000 euros, sufragados a través do Plan de Obras e Servizos da Deputación Provincial.
Os traballos arrancaron esta semana na travesía do Pedregal coa execución dun novo tramo de beirarrúa de 150 metros cadrados O tramo da estrada que vai dende o cruce coa avenida da Maía ata o cruce que dá acceso ao centro de saúde e á casa da cultura de Bertamiráns, pasará a ser de sentido único. Deste xeito, só se poderá circular dende a avenida da Maía cara ao centro de saúde. O treito que vai dende o cruce do centro de saúde cara a rotonda do Pedregal, que conflúe coa rúa Poeta da Maía, continuará sendo de dous sentidos. Ademais crearanse 40 novas prazas de aparcamento na marxe dereita da Travesía do Pedregal.
Novo aparcadoiro detrás do centro de saúde
Por outro lado, vaise habilitar un novo aparcadoiro nunha parcela municipal que se atopa detrás do centro de saúde de Bertamiráns. Tamén se executará un novo tramo de beirarrúa dende este aparcadoiro ata a rotonda do Pedregal que conflúe coa rúa Poeta da Maía.
O alcalde de Ames, Santiago Amor, destacou que “coa execución destes proxectos vaise solucionar o grave problema que existe para estacionar na contorna do centro de saúde e da casa da cultura de Bertamiráns”. Tras reorganizar o sentido de circulación nun tramo da travesía do Pedregal “mellorarase a seguridade viaria tanto de peóns como dos propios vehículos”, apunta Amor.
Contido relacionado
El Correo Gallego: "Obras en Bertamiráns para dotar con parquin a la zona del centro de salud"
La Voz de Galicia: "El Concello busca la normalidad y anuncia obras en Bertamiráns"