O proceso que segue a Policía Local para retirar aqueles vehículos que están abandonados na rúa é longo e require unha serie de formalidades necesarias para cumprir coa lexislación vixente en materia de seguridade viaria. A través da vixilancia e do control diario, os e as axentes municipais van detectando a existencia de coches que parecen atoparse en estado de abandono. Noutros casos son os propios veciños e veciñas da zona os que se dirixen aos axentes para avisar da presenza dun vehículo supostamente abandonado.

Durante o ano 2013 abríronse un total de 49 expedientes por abandono de vehículos na vía pública. Deste total, 29 foron retirados da rúa polo propietario despois de ser requiridos para iso polo Concello, mentres que 8 foron retirados da rúa e trasladados ao depósito (dos cales 3 foron retirados do depósito polos propietarios, 4 foron entregados ao centro autorizado para o seu tratamento como residuo e 1 está pendente de que o seu titular se faga cargo ou, de non facerse cargo, transcorridos os prazos, procederase a súa entrega ao centro autorizado para o seu tratamento como residuo).

Por outra banda, 3 vehículos teñen orden de retirada e traslado ao depósito, pero aínda non foron retirados polo guindastre. Os 9 restantes están en fase de espera para que os propietarios reciban a notificación (que xa foi enviada) xa sexa domiciliaria, ou a través do BOP e dos taboleiro de editos do seu último domicilio coñecido, para poder empezar a contar os prazos de retirada.

Tramitación para a retirada de vehículos
Os expedientes de vehículos abandonados requiren dunha tramitación que pode dividirse en tres fases. A Policía Local (ou a Garda Civil, nalgúns casos) emite un informe no que se reflicte a existencia dun vehículo que presumiblemente está abandonado (que leva máis dun mes aparcado no mesmo sitio, presenta un estado de deterioro xeneralizado e na maioría dos casos carece de seguro obrigatorio e ITV). Neste informe indícase a dirección que figura en tráfico do titular do vehículo.

Posteriormente, desde o departamento municipal de Secretaría requíreselle ao titular do vehículo, na dirección que figura no informe da Policía Local, para que no prazo de 15 días proceda a retirar o seu vehículo da rúa ou do contrario o Concello procederá a súa retirada ao depósito habilitado ao efecto, o que orixinará a imposición da taxa prevista na Ordenanza fiscal reguladora da taxa por actividades relacionadas coa hixiene urbana. No caso de resultar infrutuosa a notificación domiciliaria procédese a súa notificación ao BOP e remisión ao taboleiro de editos do Concello do seu último domicilio coñecido.

Transcorridos 15 días desde que se efectúa a notificación domiciliaria, e nos casos nos que non é posible, no BOP e taboleiro de editos, a Policía Local, a petición do departamento de Secretaría, emite un novo informe no que se comproba se o vehículo foi retirado do lugar no que estaba abandonado polo seu titular, ou si pola contra continúa no mesmo lugar.

Naqueles casos nos que a Policía Local informa que o vehículo foi retirado, este expediente pasa á fase de arquivo. No caso de que o vehículo siga no mesmo lugar, emítese un decreto para a súa retirada do que se lle dá traslado á Policía Local, para que realice un novo informe no que indique o día no que se procedeu á retirada e traslado do vehículo ao depósito establecido ao efecto.

Transcorrido un mes desde que o vehículo está no depósito, procédese a requirirlle novamente ao titular para que retire o seu vehículo no prazo dun mes dende a recepción da comunicación, advertíndolle que de non facelo así, procederase ao seu traslado a un Centro Autorizado de Tratamento. Novamente, no caso de que resulte infrutuosa a notificación domiciliaria hai que proceder á súa notificación mediante anuncio no BOP e remisión ao taboleiro de editos do Concello do seu último domicilio coñecido.

Unha vez transcorrido o prazo, e constatado de que o titular non procedeu á retirada do vehículo, emítese o correspondente decreto de achatarramento no que se declara o vehículo en estado de abandono e se ordena a súa entrega ao centro autorizado para o seu tratamento como residuo.