Na comunicación remitida pola Mancomunidade ao Concello na xornada de onte, con motivo do día elixido para a folga, o servizo de recollida do lixo quedará interrompido durante tres días consecutivos: venres día 4 por ser día festivo local en Lousame (concello no que se sitúa o Complexo), sábado día 5 (día da folga) e domingo día 6 de outubro. 

O Concello de Ames explica que a Presidencia da Mancomunidade decretou a prestación duns servizos mínimos equivalentes o 40% da xornada normal de traballo e na totalidade dos servizos obxecto da concesión, prestándolle especial atención aos centros de ensino, saúde, terceira idade e aqueloutros que polas súas características puideran representar un risco para a saúde ou para o tránsito de persoas e vehículos.

Ademais, e dado que o servizo non se normalizará ata o luns, día 7 de outubro de 2013, o Concello de Ames solicita de todos os veciños a súa colaboración atendendo a varias recomendacións. Entre estes consellos, está o de reducir a produción de lixo o máximo posible e que os restos de comida, especialmente de peixe e semellantes, deberán introducirse en dobre bolsa, asegurando a súa hermeticidade.

Tamén se indica que se informará puntualmente, a través de bandos, das novas que se produzan. Aínda así, para calquera información ou emerxencia relacionada con este servizo poderanse utilizar os seguintes teléfonos: o da empresa concesionaria do servizo (981-191240) ou o da Policía Local do Concello (619-767575).

Por último, e diante da falta de prestación deste servizo básico, esencial para todos os veciños, ao exercer os traballadores de FCC SA o seu lexítimo dereito de folga, o Concello de Ames destaca que só coa colaboración de todos será posible manter unhas condicións mínimas de salubridade.

Contido relacionado

La Voz de Galicia: "Ames y Brión fijan servicios mínimos del 40 % para la recogida de la basura"