Un total de 22.570 persoas están chamadas ás urnas en Ames este domingo 25 de maio. Nestas eleccións haberá 33 mesas electorais. O Milladoiro será o núcleo que contará cun maior número de mesas electorais ao ser a localidade con máis poboación con dereito a voto. Deste xeito, O Milladoiro conta con 8.869 electores e 11 mesas electorais, mentres que Bertamiráns dispón de 8 mesas electorais e 6.037 electores. O resto dos electores 7.664 terán que ir votar ás 14 mesas que estarán distribuídas polos núcleos rurais do concello.

As mesas electorais están repartidas por todas as parroquias amienses. Os veciños e veciñas censados en Agrón correspóndelles votar no local social desta parroquia. A veciñanza de Lens e Trasmonte comparten como colexio electoral a antiga escola de Trasmonte. A xente de Piñeiro acudirá a votar tamén á antiga escola unitaria desta parroquia.

Por outra banda, os electores e electoras que residen nos lugares de Oca, Seares de Abaixo, Seares de Arriba e da parroquia de Tapia, terán que acudir ao local social de Tapia, situado en Frenza. Os veciños dos lugares de Barouta, Carreira, Cruxeiras, Lamas, Outeiro, Quintáns e Pedrouzos e Vilar votarán na escola de Cruxeiras. Por último, as persoas censadas nos lugares de Augapesada, Castiñeiro de Lobo, Proupín, Castelo, Pousada, Pegariños, Padrón e Pedras teñen asignado o colexio electoral do local social de Augapesada.

Da outra banda da estrada toda a xente de Covas terá que achegarse á urna da escola unitaria para depositar o seu voto. Os electores da Ameixenda votarán no local social da parroquia. Se nos trasladamos a Bugallido, atopamos que os electores dos lugares de Barreiro, As Buceleiras, Eirapedriña, Framán, Guimaráns, O Instrumento, Mourigade, O Outeiro, Quistiláns, Firmistáns e Tarrío teñen asignado como lugar para votar o local social de Guimaráns. Neste lugar haberá dúas mesas electorais.

En Ortoño atopamos tres grandes áreas con distintos destinos á hora de votar. A xente de Bertamiráns -incluídos os lugares do Casaliño, O Pedregal, Castrigo, Cantalarrana, Carballido e A Condomiña- votará ao completo no pavillón polideportivo desta localidade. A urbanización Aldea Nova ten asignado o seu local social. Os arredores de Bertamiráns -A Igrexa, As Cortes, O Instrumento, Lapido, Maguxe, Ortoñiño, As Punxeiras Altas, A Tarroeira, Sisalde e O Santo- votarán na escola unitaria da Tarroeira.

Esta división urbano-periurbano tamén se lle aplica á parroquia de Biduído, na que se asenta o núcleo do Milladoiro. Todas as persoas censadas neste lugar terán que depositar o voto na mesa que lles corresponda do pavillón polideportivo municipal do Milladoiro. Ventín, Coira, Fraíz, A Moniña e O Paramuíño teñen asignado o colexio de Ventín. Biduído de Abaixo, Biduído de Arriba, Casanova, Costoia, Framil, A Agrela, A Igrexa, Raíces, As Mimosas e Millalar terán que votar no centro sociocultural de Biduído. Polo tanto, a mesa electoral que estaba situada no campo da festa de Biduído de Abaixo, pasará a estar colocada no centro sociocultural de Biduído.

Transporte adaptado para as eleccións europeas
Por último, infórmase de que o Concello de Ames dispón dun vehículo habilitado para o transporte de persoas con dificultades de mobilidade e que se atopará o próximo 25 de maio a disposición de todos os veciños e veciñas de Ames para facilitar o exercicio do dereito ao voto. As persoas interesadas deberán poñerse en contacto cos encargados da xestión do transporte chamando ao teléfono gratuíto 900 204 000, en horario de 9:00 h a 14:00 horas, ata o venres 23 de maio, para facer a reserva do servizo. O transporte adaptado ofrece o servizo de recollida no seu domicilio, transporte ata a mesa electoral e regreso ao seu domicilio.

Contido relacionado

La Voz de Galicia: "Ames cambia la ubicación de varias mesas electorales"