O concello de Ames dispón dunha nova ruta ambiental que discorre pola marxe esquerda do rego dos Pasos. Esta mañá membros do goberno municipal e persoal municipal percorreron esta ruta, polo que xa está rematada para que todos os veciños e veciñas que o desexen a poidan percorrer andando ou en bicicleta. Esta senda discorre pola marxe esquerda do rego dos Pasos. Actualmente ten unha lonxitude de 2 quilómetros de ida e outro 2 km de volta. A entrada provisional está situada na rúa do Lodeiro, en Bertamiráns, aínda que vaise poder acceder dende o paseo fluvial.

Esta nova senda peonil pasa polos lugares de Loureiros e Capeáns ata chega ao muíño de Covas. Dende este punto ata a aldea de Pousada continua un sendeiro, que aínda está sen acondicionar, pero que está previsto que sexa acondicionado tamén para incrementar a lonxitude de dita ruta. Incluso tense pensado que enlace co Camiño de Santiago a Fisterra-Muxía. Trátase dunha senda moi cha e facilmente practicable, tanto a pé como en bicicleta, e que permite pasar do entorno urbano ao natural nun par de minutos, facilitando deste xeito o coñecemento do medio e da flora e fauna dos regatos.

O concelleiro de Medio Ambiente e Desenvolvemento Sostible, Javier García, destacou que se trata “dunha ruta con moito carballo, hai moitas árbores frondosas que fan dela unha ruta moi fresca, ideal para o verán. Nesta primeira fase de acondicionamento, a pavimentación chega ata o muíño de Covas, porén esperamos que no futuro chegue ata o propio lugar de Pousada. Ademais, permítenos mudar do entorno urbano ao natural moi rápido, facilitando o coñecemento do medio e da flora e fauna dos regatos”.

Esta actuación, que tivo un custe de 18.500 euros, sufragouse a través do Plan Provincial de Medio Ambiente da Deputación da Coruña. Dentro deste mesmo plan o Concello de Ames dispuxo dunha partida de 17.637 euros para a contratación dunha brigada de xestión dos espazos naturais. Para realizar estas obras contouse coa autorización previa de Augas de Galicia. A normativa establece que este tipo de sendeiros pódense executar nos 5 metros que hai dende a beira da canle do rego. Tendo en conta isto, a nova senda construíuse deixando un espazo de 3,5 metros dende o rego, para poder realizar posibles traballos de repoboación no rego dos Pasos. A senda dispón dun ancho de 1,5 metros.

Por outra banda, o concelleiro de Urbanismo, Obras Públicas e Servizos Básicos, Blas García, salientou “sorpréndeme gratamente o feito de que nos teñamos atopado ao longo da camiñada con varias persoas, tanto en bicicleta como a pé, facendo este percorrido. A ruta resulta moi agradable e é fácil de realizar; aínda así sempre hai cousas mellorables, polo que nos vindeiros meses tentaremos facer un par de áreas de descanso e merendeiros, que permitan pararse a contemplar ben o entorno”.

Contido relacionado

El Correo Gallego: "Abren o novo roteiro pola beira esquerda do rego dos Pasos"