Nos últimos meses, o Concello de Ames detectou unha notable deterioración do estado dos pasos de peóns que existen no Milladoiro, e, por este motivo, a Concellaría de Vías e Obras tomou a iniciativa de repintar estas marcas viarias.

A través desta iniciativa vaise mellorar a seguridade viaria en zonas que teñen un maior tránsito de peóns como son as rúas onde se atopa situado o centro de saúde, situado en Agro do Medio, ou a oficina de Correos, que se atopa situado na rúa Agro da Madalena. Tamén se repintaron aqueles pasos de peóns polos que camiñan os nenos e nenas que acoden a Escola Infantil do Milladoiro.

Os traballos estanse realizando nos pasos de peóns das rúas Agro do Medio, Agro da Madalena e Cereixos. Ademais, estas actuacións tamén comprenden o cruce de Agro do Medio coas rúas Pardiñeiros e Curuxa. A empresa encargada de repintar os pasos de peóns está empregando pintura acrílica de larga duración e alta resistencia con banda de parada. Tamén se están repintando algunhas sinais horizontais. Os traballos comezaron o pasado luns, día 27 de agosto, e prevese que se desenvolvan ao longo desta semana.

O Concelleiro de Vías e Obras, Alfredo Taboada, explicou que "estes traballos encádranse nunha primeira actuación para acondicionar a sinalización horizontal, que dará paso a máis medidas desta índole para acondicionar toda a sinalización do Concello, non soamente no núcleo urbano do Milladoiro".

Contido relacionado

El Correo Gallego: "Ames repinta os pasos de peóns de varias rúas do Milladoiro"