[08-01-2015] O alcalde de Ames, Santiago Amor, e o representante da empresa A Billarda S.L., Víctor Manuel Pérez, asinaron esta mañá o contrato do servizo de Monitoraxe na Rede Municipal de Comedores Escolares. O contrato terá unha duración máxima de execución dun ano e medio dende o día 1 de xaneiro do 2015, podendo prorrogarse por un máximo de dous anos e medio.
A Billarda S.L. foi a encargada de prestar este servizo dende o pasado mes de setembro tras un proceso de licitación no que tamén participaron as firmas COESCO e Ágora Aberta, esta última xestionou os comedores municipais dende o curso 2010-2011. Dende o Goberno local sinalan que o servizo se prestará en igualdade de condicións e garantindo a continuidade do persoal traballador que, entre monitores, coordinadores e encargados da limpeza, suman uns 100 empregados. Atenderán aos preto de 1.100 nenos e nenas dos cinco Centros de Educación Infantil e Primaria do Concello de Ames.
O alcalde amesán, Santiago Amor, indica que cinco comedores e máis de mil escolares atendidos por un cento de monitores dan idea da relevancia deste servizo municipal. “É moito máis importante do que parece prestar a debida atención durante o xantar –agrega Amor–, xa que é un momento de recreo e distensión, pero tamén extraordinariamente educativo en canto a comportamentos individuais e colectivos. Ademais aprovéitase para inculcar nos rapaces hábitos correctos de alimentación e nutrición. Este servizo público enmárcase, igualmente, na nosa política de conciliación e de fundamental apoio ás familias”.
O importe da oferta económica de A Billarda foi de 13’90 euros o prezo por hora de cada monitor, 13’00 euros á hora do coordinador e 8’50 euros o prezo por hora do servizo de limpeza, sempre máis IVE.
Contido relacionado
La Voz de Galicia: "Ames firma el contrato de los comedores, que atenderán cien monitores"