[24-10-2012] A Concellaría de Comercio e Promoción Económica en colaboración coa Asociación de Comerciantes de Bertamiráns (ACB) están organizando a Festa do comercio e o Roteiro dos petiscos, que se desenvolverá entre o 9 e o 18 de novembro nos locais de hostalería e comercios da localidade de Bertamiráns. Esta iniciativa divídese en dúas partes. Por unha banda, desenvolverase un Roteiro de petiscos durante dúas fins de semana (os venres 9 e 16, os sábados 10 e 17 e os domingos 11 e 18 de novembro) nos locais hostaleiros de Bertamiráns. Ademais, desenvolverase a Festa do comercio dende o venres 9 ata o sábado 17, de xeito ininterrompido, nos comercios desta mesma localidade.
Esta iniciativa realizarase, de forma conxunta, entre os sectores hostaleiro e comercial de Bertamiráns. O Roteiro dos petiscos, que se desenvolve durante a segunda e terceira fin de semana de novembro, estará ligado á Festa do comercio, que se desenvolverá dende o venres 9 ata o sábado 17, de xeito ininterrompido. Con esta actuación, que está aberta a todos os establecementos situados en Bertamiráns, preténdese impulsar o sector hostaleiro e comercial local.
Os petiscos presentados ao concurso deberan figurar na oferta habitual do establecemento participante e serán servidos de forma gratuíta. Os establecementos participantes deberán servir os petiscos, como mínimo, entre as 13:00 h. e as 15:00 horas, e entre as 20:30 h. e as 23:30 horas.
Os veciños e veciñas que participen no Roteiro poderán puntuar os petiscos que consuman. Deste xeito, será a clientela a que decida o petisco e establecemento gañador. O prazo de votación dará comezo o día 9 e rematará o 18 de novembro, coincidindo coas datas de inicio e final do concurso. Ademais, haberá un sorteo de premios especiais para o público participante.
De forma paralela ao Roteiro dos petiscos vaise a celebrar a Festa do comercio. O obxectivo desta actividade é dinamizar o comercio de Bertamiráns, que ofrecerá descontos e promocións especiais durante eses días.
