[28-10-2014] O Concello de Ames programa unha nova función teatral que será representada este venres, ás 21:00 horas, na casa da cultura do Milladoiro. As mil vidas de Matías Houseman é o título dun monólogo da compañía Teatro do Adro, escrito, dirixido e protagonizado por Josito Porto.
O actor interpreta a traxicómica e curiosa vida dun polifacético home de ampla traxectoria profesional que se converte en estrela da música, mafioso, líder espiritual, futbolista e ata presidente do goberno. En definitiva, o espectáculo de Matías Houseman é a historia dun home que viviu mil vidas e esqueceu vivir a súa propia.
Ao longo de 70 minutos, a obra inclúe memorables pasaxes cómicos, números mímicos ou música en directo que obrigarán aos espectadores a moldearse para entender a complexa personalidade do protagonista e dar boa conta da gran versatilidade actoral.
O público que se achegue ao Milladoiro poderá reservar as súas localidades ata as 14:00 horas do mesmo día da función chamando ao número de teléfono: 981 53 59 40 ou enviando un correo electrónico a: cultura.milladoiro@concellodeames.org. O prezo das entradas é de 5 euros para os maiores de 12 anos e os menores desa idade terán un desconto do 50 por cento así como os que posúan carné de estudante e os que superen os 65 anos.