Este mércores, 24 de outubro, celébrase o día Mundial da Biblioteca. Aproveitando esta conmemoración, a Biblioteca municipal organizou varias sesións de contacontos e obradoiros dirixidos aos rapaces e rapazas amienses. As actividades de animación á lectura que ofrece a Biblioteca municipal amósanlles aos nenos e nenas, mediante sesións de contacontos, a maxia que agochan os libros. Para un mellor funcionamento, as actividades están adaptadas ás idades dos nenos e nenas. Así, as sesións de contacontos están dirixidas especialmente aos nenos de entre 3 e 8 anos.

Estas actividades desenvolveranse nas bibliotecas de Bertamiráns e do Milladoiro, así como nos locais sociais de Aguapesada e Bugallido. A cita cos contos comeza esta semana nas bibliotecas municipais. Así, o mércores 24 de outubro, ás 18:00 h, tócalle a quenda á Biblioteca de Bertamirás, e o xoves 25, á mesma hora, á Biblioteca do Milladoiro. O martes 30 de outubro os contos chegarán ao local social de Augapesada e o día 31, ao local social de Bugallido. Todas as sesión de contacontos realizaranse ás 18:00 horas.

Os contos centraranse nunha única temática: a biblioteca. Ademais, os rapaces e rapazas poderán participar nun obradoiro de elaboración dun marcapáxinas conmemorativo do día mundial da Biblioteca. Estas actividades, como todas as demais que organiza a Biblioteca municipal teñen uns obxectivos claros: fomentar o hábito da lectura, especialmente entre os máis novos, e converter a biblioteca nun referente de encontro nun lugar axeitado para satisfacer as necesidades e inquietudes sociais, culturais, informativas e lúdicas da poboación amiense.