Durante o mes de marzo celébrase a conmemoración de tres importantes efemérides medio ambientais como son o Día Forestal Mundial, o Día Mundial da Auga e o Día Mundial da Meteoroloxía. Para conmemorar estas celebracións o Concello de Ames, a través da Aula da Natureza, organizou un completo programa de actividades que xa comezaron a pasada fin de semana e que rematan este sábado, 29 de marzo, cun acto que se desenvolverá no paseo fluvial de Bertamiráns. A través desta programación de actividades, que se denominan “Dálle vida ao Sar”, preténdese realizar unha acción conxunta de mellora da calidade ambiental do río Sar.

O acto central da programación do Día Mundial da Auga realizarase este sábado, 29 de marzo, no paseo fluvial de Bertamiráns. A partir das 12:30 horas desenvolveranse unha serie de actividades para conmemorar o día Forestal Mundial, o Día Mundial da Auga e o día Mundial de Meteoroloxía, que se celebran os días 21, 22 e 23 de marzo, respectivamente. Deste xeito, lanzaranse máis de 3.000 bolas de arxila con microorganismo eficientes nun tramo do río Sar duns 1.200 metros cadrados aproximadamente, para mellorar o fondo e a calidade da auga deste río.

Estas bolas de arxila foron elaboradas o sábado pasado nun obradoiro que tivo lugar na Aula da Natureza e no que participaron un grupo de 30 veciños e veciñas de Ames. Estes microorganismos eficientes quedaron fermentando na Aula da Natureza ao longo de toda esta semana para despois ser lanzados ao río Sar. A través desta actuación preténdese que os fangos contidos no interior do tramo do río Sar onde se vai actuar, se mineralicen e se convertan en compostos húmicos, capaces de reproducir e manter a vida do río na súa forma non contaminada, coa conseguinte recolonización de vexetais e fauna acuática característica da zona.

Estes microorganismos efectivos cambian a micro e macroflora dos chans, e melloran o equilibrio natural, de maneira que os chans con axentes patóxenos se converten en chans supresores de enfermidades. Ademais, restablecen o equilibrio microbiolóxico do chan, mellorando as súas condicións físico-químicas, incrementando a produción dos cultivos e a súa protección. A través dos efectos antioxidantes promoven a descomposición da materia orgánica e aumentan o contido de humus, así como axudan a conservar os recursos naturais, xerando unha agricultura sostible.

Obradoiros relacionados coa auga
Por outra banda, no contorno do paseo fluvial de Bertamiráns impartiranse obradoiros relacionados coa auga. Tamén haberá música e unha exposición sobre a bolboreta monarca, que está sufrindo cambios na súa migración debido aos efectos do cambio climático.

Previamente, o venres 21 de marzo o Pazo da Peregrina acolleu unha charla-coloquio sobre a mellora das características físicas, biolóxicas e supresión de enfermidades dos fondos fluviais a través da aplicación de microorganismos efectivos. A través desta charla a veciñanza amiense coñeceu como actúan estes microorganismos nos lodos do río Sar.