[12-02-2016] O Concello de Ames, a través da concellaría de Servizos Sociais e Igualdade, realizou esta mañá, ás 12:00 horas, unha concentración diante da Casa do Concello, en Bertamiráns, e diante das oficinas municipais do Milladoiro en repulsa do caso de violencia machista que ocorreu onte pola tarde na parroquia de San Pedro de Tortes, pertencente ao concello de Becerreá. Trátase da primeira vítima de violencia machista en Galicia durante este ano 2016.
Os membros da corporación municipal e os traballadores do Concello de Ames mostraron esta mañá a súa repulsa ao asasinato machista dunha muller en Becerreá, a primeira vítima da violencia machista este ano en Galicia. A concentración, que tivo lugar en Bertamiráns e no Milladoiro, comezou cun minuto de silencio en lembranza desta muller que foi vítima deste lacra. A concelleira de Servizos Sociais e Igualdade, Luísa Feijóo, asistiu á concentración celebrada no Milladoiro.
O primeiro caso de violencia doméstica deste ano en Galicia produciuse pasadas o seis da tarde de onte na aldea Herbón, parroquia de San Pedro de Tortes, a uns cinco quilómetros do centro de Becerreá.
O Concello de Ames pon a disposición de todas aquelas mulleres que precisen información sobre o maltrato teléfonos de atención dos Servizos Sociais de Bertamiráns, 981 890 964, e dos Servizos Sociais do Milladoiro, 981 535 941. Ademais, tamén poden recibir atención no 016, o Teléfono da Muller.
