A e-Administración ou Administración electrónica fai referencia á incorporación das tecnoloxías da información e as comunicacións nas administracións públicas en dúas vertentes. Primeiro dende un punto de vista intraorganizativo; transformando as oficinas tradicionais e convertendo os procesos en papel en procesos electrónicos, co fin de crear unha oficina sen papeis. A segunda é dende unha perspectiva das relacións externas; para habilitar a vía electrónica como un novo medio para a relación co cidadán e empresas. É unha ferramenta cun elevado potencial de mellora da produtividade e simplificación dos diferentes procesos do día a día que se dan nas diferentes organizacións.

A Lei 39/2015, de 1 de outubro, do procedemento administrativo común das administracións públicas e a Lei 40/2015, de 1 de outubro, do réxime xurídico do sector público supoñen un forte impulso á dixitalización das administracións públicas e establecen varias obrigas en torno á Administración electrónica que propician unha maior eficacia, innovación e modernización. Entre as obrigas introducidas por estas leis están, entre outras, a de dispoñer das ferramentas e recursos necesarios para garantir a relación electrónica cos obrigados pola lei e coas persoas físicas que así o prefiran e a tramitación electrónica dos expedientes.

Dende o ano 2010, o Concello leva traballando na integración das novas tecnoloxías á Administración creándose a sede electrónica do Concello de Ames e o inicio da utilización do Sistema Integrado de Xestión Municipal (SIGEM) nestes últimos anos de maneira que foise implantando progresivamente a xestión electrónica dos expedientes. Todos estes avances teñen o soporte da Deputación Provincial da Coruña, cuxo obxectivo é achegar a Administración ao cidadán e alcanzar a plena implantación da Administración electrónica en todos os Concellos da provincia.

Sistema de Interconexión de Rexistros (SIR)
Dando continuidade a esta implantación da Administración electrónica no Concello de Ames, o pasado mes de febreiro o Concello de Ames integrouse plenamente no Sistema de Interconexión de Rexistros (SIR), sendo un dos primeiros Concellos en facelo, o cal implica que se poden recibir e enviar escritos dos cidadáns dende o Concello de Ames a calquera das oficinas de rexistro integradas no sistema.

A través do SIR o intercambio de información realízase dunha forma segura e con conformidade legal, independentemente da aplicación de rexistro utilizada, sempre que estea certificada na Norma SICRES 3.0. A implantación deste sistema permite eliminar o tránsito de papel entre administracións aumentando a eficiencia e eliminando os custe de manipulación e remisión de papel, grazas á xeración de copias auténticas electrónicas da documentación presentadas nos asentos de rexistro.

Así mesmo, esta semana comezou a funcionar a tramitación electrónica dos decretos da Alcaldía, un procedemento que quedou sen facer no ano 2013 e que suporá unha maior axilidade no traballo e posibilitará en breves datas a notificación telemática a particulares e empresas. Antes de implantar ditos sistemas o persoal do Concello de Ames participou nunha xornadas de formación onde se lles explicou as diferentes posibilidades que ofrecen estas aplicacións. A formación realizouse en grupos reducidos e en varias sesións.

A plataforma tecnolóxica integral de Concellos permite garantir a relación electrónica coa cidadanía, dar soporte á tramitación electrónica, facilitar o arquivo electrónico dos expedientes, garantir o dereito á información e a transparencia, alcanzar o completo funcionamento electrónico interno e impulsar a coordinación entre administracións. Trátase dunha solución tecnolóxica integral para os servizos de rexistro, tramitación e arquivo.

Tamén nesta última semana incorporouse o sistema de portafirmas de xeito que varios dos traballadores do Concello tramitan os documentos de xeito electrónico para poder ser asinados a través do portafirmas dende calquera lugar e momento. O propio alcalde e secretaria xa asinan de xeito electrónico a través deste portal dende a pasada semana.

Nodo de interoperabilidade PasaXe!
Ademais, existe o nodo de interoperabilidade PasaXe! que permite avanzar na interoperabilidade co obxectivo de reducir as cargas administrativas que soportan os cidadáns e as empresas galegas, así como incrementar a colaboración inter-administrativa. En concreto permite acceder aos servizos do nodo de intermediación da Administración Xeral do Estado (Catastro, AEAT, DNI-Policía, Seguridade Social, etc). Tamén pon a disposición de calquera administración pública datos xerados pola Xunta de Galicia (familia numerosa, discapacidade, etc).

Outra das aplicacións integrada na plataforma TEDeC é a de Accede PMH – Padrón municipal de habitantes que permite acceder a un volante de empadroamento, certificado individual/colectivo, certificado negativo individual/colectivo, certificado histórico individual, volante de empadroamento selado de forma automática e certificados dispoñibles para firma en aplicación.

O alcalde e concelleiro de novas tecnoloxías, José Miñones, explica que "os avances incorporados nestes meses veranse incrementados en breve e levarán un investimento paralelo en equipamentos. Con todo esperamos poder conseguir en breve incorporar novos procedementos electrónicos para a cidadanía que posibiliten a relación co Concello dende as súas casas".