Cómpre lembrar que na Xunta de Goberno Local, celebrada o 15 de maio do pasado ano 2015, deuse aprobación ás bases da convocatoria de subvencións para a promoción de festas populares celebradas no exercicio 2015. Posteriormente, xa co novo goberno municipal, o pasado 5 de novembro de 2015, a Xunta de Goberno aprobou o reparto de achegas con cargo a esta convocatoria de axudas.

Agora, tendo en conta que as entidades solicitantes achegaron toda a documentación xustificativa esixida polas bases reguladoras da convocatoria, e revisada polo departamento municipal de Cultura, a Xunta de Goberno Local acordou aprobar o pagamento destas subvencións.

Deste xeito, nas vindeiras semanas o Concello de Ames ingresará un total de 17.900 euros entre 6 entidades municipais. As asociación beneficiarias son a Asociación de Veciños de Bugallido, que recibirá 2.000 euros; a Asociación cultural e de festexos Virxe da Peregrina que disporá de 7.000 euros; a Asociación cultural - comisión de festas San Lourenzo de Agrón á cal lle corresponden 900 euros; a Asociación de festas do Milladoiro que percibirá 7.000 euros; a Asociación cultural San Xoanciño de Pousada que recibirá 500 euros; e a Asociación social e cultural e deportiva O Corpiño, que ingresará outros 500 euros.

O concelleiro de Educación e Cultura, David Santomil, explica que "nas vindeiras semanas estas seis asociacións recibirán os importes que lle foron concedidos a través desta liña de axudas públicas e revisaranse as bases para convocar canto antes as subvencións correspondentes ao ano 2016".

Contido relacionado

La Voz de Galicia:"El Concello de Ames asigna cerca de 18.000 euros para organizar festejos populares"
El Correo Gallego:"Reparten 18.000 euros en subvenciones entre 6 asociaciones de festejos"