Co inicio do mes de setembro o club de patinaxe artística Sarela abre un prazo de novas inscricións para que todos aqueles rapaces e rapazas que estean interesados poidan  iniciarse na práctica desta modalidade deportiva. As familias con nenos e nenas que teñan de 3 anos en diante poden informarse sen compromiso a través das diferentes canles de comunicación que ten dito club.

Pódese enviar un correo electrónico ao enderezo clubdepatinaxesarela@gmail.com, escribir un WhatsApp ao número de teléfono 717714221 ou acceder ás canles de Instagram: @cpsarela, e de Facebook: patinaxesarela.   

Máis de 60 patinadoras e patinadores
O club de patinaxe artística Sarela naceu en setembro de 2013 debido ao crecemento deste deporte en Ames. Actualmente conta con máis de 60 patinadoras e patinadores de 3 a 21 anos, repartidos nos grupos de aprendizaxe: iniciación, niveis, amateur, rexional e nacional.

Ademais encárganse da xestión dos grupos de Bertamiráns e Barouta da modalidade de patinaxe das Escolas deportivas municipais, e da impartición de actividades extraescolares de patinaxe nalgún dos colexios de Bertamiráns.

O club conta con adestramento para todos os niveis da modalidade libre individual, tendo adestramentos de iniciación, precompetición, niveis, categoría amateur, categoría rexional e categoría nacional. Os patinadores e patinadoras do CP Sarela adestran no pavillón do CEIP Barouta e no pavillón municipal de Bertamiráns.