- Tematica
O club Ames Atletismo presenta a súa nova tempada deportiva 2025/26 coa posta en marcha no mes de setembro cun mes de portas abertas e un campus deportivo. Deste xeito, dende o club continuarán adestrando todas as disciplinas do atletismo dun xeito lúdico e adaptándose ás necesidades de cada atleta. Un ano máis, contará coa colaboración do Concello de Ames na cesión de instalacións deportivas e na promoción da programación deportiva.
Mes de portas abertas
O club amesán inicia a vindeira temporada cun mes de portas abertas e, deste xeito, achegar ás novas xeracións o atletismo. A través de probar e descubrir as diferentes disciplinas do deporte, preténdese facilitar que novos nenos/as practiquen e teñan interese polo atletismo. Así, ao longo do mes de setembro, as persoas interesadas (sempre nadas en 2021 ou anos anteriores) poderán acudir a adestrar todas as veces que o desexen.
O lugar de adestramento é o centro de lanzamentos de Ames (parte traseira do colexio de Ventín). As xornadas de portas abertas desenvolveranse de luns a venres, ás 18:00 horas. Para atopar máis información e realizar a inscrición pódese acceder á web de Ames Atletismo premendo nesta ligazón ou escribir ao seu enderezo electrónico, amesatletismo@gmail.com.
Campus de iniciación ao atletismo
Por outra banda, Ames Atletismo tamén ten o seu propio campus de verán, orientado tanto a atletas do club como a novas incorporacións. No caso de deportistas que xa coñezan as disciplinas, será un xeito de comezar a tempada de forma divertida e relaxada. No caso de aqueles que aínda non probaron o deporte, o campus permitiralles achegarse ás distintas modalidades desta disciplina: velocidade, saltos, lanzamentos, marcha, fondo...
Tras o desenvolvemento da primeira quenda no mes de xuño, o campus retomarase de novo, do 1 ao 6 setembro, no centro de lanzamentos de Biduído e piscinas do Milladoiro. A recepción realizarase ás 8:30 horas, e as actividades terán lugar de 9:00 a 14:00 horas. Os rapaces e rapazas poderán ser recollidos entre as 14:00 e as 14:30 horas.
Novamente, para atopar máis información e realizar a inscrición pódese acceder á web de Ames Atletismo premendo nesta ligazón ou escribir ao seu enderezo electrónico, amesatletismo@gmail.com. A data límite para realizar a inscrición no campus é o vindeiro 29 de agosto.
Novas relacionadas:
El Correo Gallego: "El club de atletismo amiense anuncia en septiembre Jornadas de puertas abiertas y un campus de verano"
Diario de Santiago: "O club Ames Atletismo oferta xornadas de portas abertas e un campus deportivo durante o mes de setembro"
