“TRES” é o novo thriller de Juanjo Giménez protagonizado por unha brillante Marta Nieto que interpreta a C., unha deseñadora de son que goza do seu traballo e pasa moitas horas soa, gravando efectos sala, wild-tracks, editando, mesturando. O estudo é o seu último refuxio: un lugar onde postergar as avariadas relacións que mantén coa súa exparella, coa súa anciá nai e cos seus compañeiros de traballo. Aínda que ela non o sabe, C comeza a desincronizarse. Coma se fose unha película mal sonorizada, o seu cerebro procesa o son máis tarde que as imaxes. Completan a repartición Miki Esparbé, Francisco Reyes e os actores galegos Luisa Merelas, Cris Iglesias e Fran Lareu.

O filme tivo moi boa acollida no seu paso polos festivais de Toronto, Giornate Degli Autori de Venecia, SEMINCI, Abycine; no que foi recoñecida co Premio Película Nova e en Sitges; onde obtivo o Premio Méliès d’Argent á mellor película. A estes recoñecementos, súmanse o Premio Goya ao mellor son para Daniel Fontrodona, Marc Orts, Marc Bech e Oriol Tarragó, o nomeamento ao Premio Goya ao mellor guión orixinal para Juanjo Giménez e Pere Altimira, o Premi Gaudí ao mellor son e as tres nomeamentos aos Premios Feroz 2022 (mellor película dramática, mellor guion para Juanjo Giménez e Pere Altimira e mellor actriz protagonista para Marta Nieto).

“TRES” é unha produción de Luisa Romeo para Frida Films que conta coa axuda de ICAA, ICEC e AGADIC e coa participación de Radiotelevisión Española, TVG, Televisió de Catalunya e Canle Plus Francia, ademais dos fondos de MEDIA e EURIMAGES. A película é distribuída en España por Filmax. A proxección deste filme será o mércores 16 de novembro, ás 20:00 horas, na Casa da Cultura de Bertamiráns. Os convites, de balde, xa se poden retirar na Billeteira electrónica do Concello de Ames.

Ciclo Mestre Mateo
O Concello de Ames, a través da Concellaría de Cultura, é un dos cinco municipios da provincia da Coruña que forman parte do circuíto de cinema Ciclo Mestre Mateo, unha iniciativa conxunta da Academia Galega do Audiovisual e das catro Deputacións para achegar os proxectos cinematográficos máis destacados de Galicia aos concellos e as vilas, aos que habitualmente non chegan as producións que participan nestes premios. Neste senso, o Ciclo Mestre Mateo colabora tamén coa Secretaría Xeral de Emigración para levar proxeccións ás comunidades galegas do exterior.

En total, e ao longo do 2022, o Ciclo Mestre Mateo presenta oito producións finalistas nas categorías de mellor documental e mellor longametraxe desta edición dos Premios Mestre Mateo, que se van desvelando a principios de cada mes. Deste xeito, os documentais que se proxectaron a través deste ciclo son “A poeta analfabeta”, “A virxe roxa”, “O gran camiño” e “Welcome to ma maison”, ademais das películas “Cuñados”, “Jacinto”, “Malencolía” e “Tres”.

Novas relacionadas:

AMS GO!: "O filme 'Tres' continúa as proxeccións do ciclo Mestre Mateo en Ames"

El Correo Gallego: "Proxectan de balde o filme 'Tres', que gañou outros tantos Mestre Mateo"