[26-05-2018] A xornada-taller “Activando o noso corpo” desenvolverase o martes, 29 de maio, ás 16:30 horas, no Centro de Día do Milladoiro (rúa Palmeiras, número 26). Dirixido ás persoas maiores do concello, o taller terá como obxectivo conservar e recuperar a fluidez e a estabilidade dos movementos, gañando autonomía e mellorando á mobilidade das persoas participantes. A xornada-taller, que conta coa colaboración do Concello de Ames, será impartida pola fisioterapeuta Laura Míguez. Para obter máis información pódese enviar un correo electrónico ao enderezo info@centrodediamilladoiro.es ou chamar ao número de teléfono 981 93 75 76.
O Centro de Día Milladoiro e a Clínica de Fisioterapia Laura Míguez organizan para o vindeiro 29 de maio unha xornada-taller, orientada á activación corporal das persoas maiores. Dito taller ten como obxectivo fomentar o mantemento e mesmo a recuperación da mobilidade dos brazos e das pernas, aumentando tamén a estabilidade á hora de camiñar ou realizar calquera tipo de movemento.
Desta maneira, a xornada-taller estará orientada á realización de exercicios de fisioterapia, que combinarán a relaxación coa ximnástica. Con estes exercicios, as persoas participantes traballarán diferentes aspectos como a coordinación, o equilibro, a forza ou o control dos movementos. O taller será impartido pola fisioterapeuta Laura Míguez.
A iniciativa, que está dirixida ás persoas maiores do concello, desenvolverase no Centro de Día do Milladoiro, a partir das 16:30 horas. Para asistir será preciso inscribirse previamente a través do enderezo de correo electrónico info@centrodediamilladoiro.es ou do número de teléfono 981 93 75 76. Así mesmo, as persoas que queiran obter máis información sobre esta actividade gratuíta poderán contactar co Centro de Día do Milladoiro a través do correo ou do teléfono anteriormente indicados.
Contido relacionado
El Correo Gallego: "Taller para que os maiores amienses activen o corpo"