[06-06-2016] Este domingo 5 de xuño os xogadores do filial do Bertamiráns FC proclamáronse campións do XXXV Trofeo de Fútbol Concello de Ames, tras gañar por 2-0 ao Biduído SR. Os xogadores pecharon así a tempada deportiva e recibiron o trofeo de mans do alcalde de Ames e concelleiro de Deportes, José Miñones.
125 persoas achegáronse a tarde do domingo até o campo municipal, seareiros de ambos os dous equipos. O partido comezou ás 19:00 horas no campo de fútbol de Bertamiráns, enfrontándose o Biduído SR e Bertamiráns FC, finalistas desta edición do Trofeo de Fútbol Concello de Ames. O primeiro chegou á final tras derrotar ao CF Agrón, mentres que o segundo fixo o propio contra o Bugallido CF. O partido foi arbitrado por Adrián Casado e Álvaro Domínguez e Enrique Refojo na banda.
No minuto 32 da primeira parte chegou o primeiro gol do Bertamiráns CF, despois dun disparo de penalti. Na segunda parte o equipo amesán volveu marcar, esta vez dende fora da área e tras un despexe falido dun dos defensas do Biduído SR. Tralo remate do partido o concelleiro de Urbanismo e Obras Públicas, Blas García, entregoulle o trofeo de subcampeón aos xogadores do Biduído SR. A continuación o Bertamiráns FC recolleu o trofeo de campión que lles entregou o alcalde de Ames, José Miñones. Ademais repartíronse medallas a todos os participantes, aos adestradores do Biduído SR e do Bertamiráns CF e aos presidentes de ambos clubs.
