Durante esta fin de semana haberá diferentes actos deportivos no Concello de Ames. O venres e o sábado o Bertamiráns FC e o Milladoiro SD celebran as súas festas de fin de temporada, mentres que o domingo continúa a actividade deportiva coa final da Copa Autonómica feminina de fútbol sala que se disputará no pavillón de Bertamiráns.

O Bertamiráns FC celebra a súa festa de temporada este venres, 22 de xuño, no pavillón polideportivo de Bertamiráns. A celebración comezará ás 22:00 horas cunha gran churrascada e sardiñada.

O día seguinte será a quenda para os membros do Milladoiro SD. Esta festa celebrarase nos arredores do campo municipal de fútbol do Milladoiro, onde tamén haberá churrasco e sardiñas. Ás 14:00 horas haberá unha churrascada. Pola tarde instalarse un proxector e unha pantalla para ver o partido de fútbol de cuartos de final da Eurocopa que disputan as seleccións de fútbol de España e Francia. Para rematar a festa a partir das 22:00 horas farase unha sardiñada.

Nestas festas ademais dos primeiros equipos do Bertamiráns FC e do Milladoiro SD xuntáranse os equipos das categorías de base. O Bertamiráns FC conta con preto de 400 nenos/as que compiten en oito categorías diferentes de fútbol base, mentres que o Milladoiro SD conta con 200 nenos/as pertencentes a 7 categorías de fútbol base.

Final da Copa autonómica de fútbol sala feminino

Por outra banda, o domingo 24 de xuño, ás 18 horas, o pavillón polideportivo de Bertamiráns acolle a final da Copa Autonómica feminina de fútbol sala que se disputará no pavillón de Bertamiráns. Esta final disputarse entre o Fisober FSF (campión da Liga Autonómica) e o Leis de Pontevedra (terceiro clasificado da Liga Autonómica). Esta final está organizada polo club amiense Fútbol Club Meigas.