Trala imposibilidade de actuar durante a programación de Nadal os Tres Tenedores pisan escenario amesán este mes de febreiro. Cocido sinfónico é un espectáculo innovador de teatro, música e humor, dirixido a un público infantil e familiar. Saúl Cacharrón, Paco Nogueiras e Martín Nogueira son os encargados de preparar este "cocido" musical. O menú está composto de música interpretada en directo, clown e moito humor.

Tres vagabundos transfórmanse en cociñeiro, xefe de cociña e camareiro ao tempo que lles mostran a nenos e nenas a súa forma, moi particular, de preparar suculentos pratos. Enriba da mesa, acompañados polos tres tenedores, os pratos do Cocido sinfónico deixarán un regusto con sabor a risas no público.

Os Tres Tenedores levan dende o 2010 actuando por toda Galicia cunha bagaxe de máis de 60 actuacións. Contan con espectáculos innovadores de teatro, música e humor, dirixido a un público infantil e familiar onde se mestura o coñecemento sobre as distintas familias de instrumentos, estilos musicais máis relevantes, instrumentos de refugallo, variadas coreografías... ofrecéndoo dun xeito divertido, didáctico e orixinal, onde os rapaces e rapazas son tamén os protagonistas principais do espectáculo. En definitiva, trátase un grupo de docentes e musicólogos con ampla experiencia no eido das artes escénicas e musicais.

O prezo das entradas para asistir a este espectáculo é de 4 euros. Os maiores de 65 anos, menores de 12 e os estudantes poderán adquirila por un prezo reducido de 2 euros. As entradas xa están á venta na Billeteira electrónica municipal, á que se pode acceder dende o banner da páxina web do Concello. Os tíckets de entrada tamén se poden adquirir na billeteira da propia Casa da Cultura unha hora antes do comezo da obra.