O Apalpador, un home xigante e barbudo, baixaba a finais do mes de decembro e, de casa en casa, comprobaba que nenos e nenas comesen ben palpándolles na barriga. Esta personaxe lendaria galega deixaba presas de castañas aos pequenos e agasallos que el mesmo facía. Dende fai un tempo trátase de recuperar esta figura tradicional, que foi sendo desprazada pouco a pouco pola de Santa Claus ou os tres Reis Magos.

O contador de contos galego, Anxo Moure, foi o encargado de poñerse na pel do Apalpador. Moure relatoulles aos nenos e nenas a súa orixe, transportándoos nunha viaxe para coñecer a fauna e flora do Courel onde habita o resto do ano. Alumnos e alumnas coñeceron da man do Apalpador a historia da Coureliña, lobiña do Courel cuxo hábitat se atopa en perigo pola progresiva desaparición dos bosques e a contaminación. A personaxe pediulles a todos que medrasen coidando da natureza, respectándoa e axudando á súa conservación.

O Apalpador non veu só cargado de contos, castañas e agasallos, senón tamén de música, e non marchou sen antes apalpar as barrigas de nenos e nenas para comprobar que comían ben. Ademais preguntoulles pola súa alimentación, explicándolles os beneficios da comida da casa, do queixo e do leite dos gandeiros galegos, e da necesidade de evitar 'as hamburguesas ou as chuches'.

Os centros que recibiron ao Apalpador son a Escola Infantil Galiña Azul do Milladoiro, a Escola Infantil Municipal da Madalena e o CEP de Ventín o xoves e a Escola Infantil Municipal do Bosque e as escolas unitarias de Terroeira e Covas o venres.

Esta actividade abre a programación de Nadal que organizou o Concello de Ames a través da concellaría de Cultura. Durante os meses de decembro e xaneiro terán lugar, entre Bertamiráns e no Milladoiro, oito representacións, cinco encontros deportivos (entre eles a Gala de Fútbol Feminino en xaneiro), tres concertos e seis obradoiros para a infancia e a mocidade, como o de robótica ou o obradoiro de DJ.