[22-06-2012] A Casa da Cultura de Bertamiráns acolleu esta tarde o festival de fin de curso da Escola Municipal de Música de Ames (EMMA). A cita estivo presentada polos alumnos Óscar Suárez e Alejandro Gómez. Durante as actuacións, unha representación dos nenos e nenas da escola tocaron pezas amenas, e interpretaron tanto aos clásicos coma pezas máis modernas. Ao festival asistiron o alcalde de Ames, Santiago Amor; a concelleira de Cultura, Eugenia Martín; o concelleiro de Servizos, Ramón Argibay, e o edil de Deportes, Manuel Ferreiro.
O principal obxectivo deste concerto foi que os alumnos e alumnas da escola puidesen poñer en práctica as destrezas que adquiriron cos seus instrumentos durante este curso. Aos nenos e nenas fíxolle unha especial ilusión tocar diante dos seus pais e nais, pero tamén para toda a cidadanía en xeral que desexaron gozar do concerto.
Este concerto clausurou o curso 2011-2012 e serviu para mostrarlles ás familias do alumnado e á cidadanía o traballo que se desenvolveu durante estes últimos meses na EMMA.