Na mañá deste luns, 9 de xuño, o alumnado de 4º da ESO do IES do Milladoiro recibiu a visita de oito coworkers do Espazo A Proa na que puideron achegarlle aos mozos e mozas as posibles saídas e posibilidades do mundo laboral, xunto coa oportunidade e realidade de crear e emprender proxectos propios. Ás charlas asistiron, en representación do Goberno municipal, a concelleira de Educación, Carmen Porto, e a concelleira de Promoción Económica, Ana Belén Paz. 

Nestas charlas participaron: Juan Magariños, do proxecto Vivir desde el Ser; Marcos Estévez, da empresa de enxeñería agroforestal e consultoría de bioeconomía Amonte; Laura Piñeiro, editora de vídeo profesional; Carla Caamaño, subtituladora no mundo audiovisual; Marisa Dequidt e Paz Gómez, da cooperativa de consultas enerxétiñas Avelaíñas Coop. Galega; Carlos L. Ríos, da plataforma web Gran Rural; e Laura Iglesias, da rede social Livddans. Por parte do centro educativo, a actividade contou coa colaboración da profesora de economía, Silvia Calvino, e o profesor de matemáticas, Pablo Martínez. 

A concelleira de Promoción Económica, Ana Belén Paz, explicou que “como o alumnado non puido desprazarse ao Espazo A Proa, ofreceuse a posibilidade de que os coworkers se achegaran ata o instituto para impartir estas charlas complementarias á súa formación educativa”. 

Ao longo das súas intervencións, cada un dos profesionais puido contar a súa experiencia e percorrido no mundo laboral, dende o momento de escoller os seus estudos ata os diversos postos de traballo que tiveron ata chegar ao momento actual. Así, achegáronlles aos mozos e mozas a realidade do ámbito laboral, xunto  co gran ábano de camiños e posibilidades que hai para poder chegar a traballar no que realmente queiran

Deste xeito, o alumnado, que está a piques de rematar a etapa de educación obrigatoria, puido coñecer de primeira man as diversas opcións saídas laborais ás que poden optar nun futuro. Ademais, todas as intervencións dos coworkers fixeron fincapé na importancia en que a mocidade continúe a formarse e, sobre todo, que non teñan medo a errar e escoller a súa rama profesional xa que, nun futuro, poderán ter a oportunidade de cambiar ou redirixila cara outras opcións. 

Novas relacionadas: 

El Correo Gallego: "Oito coworkers orientan dende a experiencia os mozos e mozas do IES do Milladoiro"

Diario de Santiago: "O alumnado do IES do Milladoiro recibiu a visita de oito coworkers do Espazo A Proa"