[22-02-2018] As nenas e nenos das diferentes aulas do 2º e 4º curso de Primaria do CEP de Ventín participaron, ao longo desta semana, nunha charla sobre seguridade viaria que foi impartida pola axente do corpo da Policía Local de Ames, Cristina Ferreira. A charla buscou pór o foco e concienciar ás crianzas acerca das normas básicas que se deben seguir nos desprazamentos a pé, en bicicleta ou nun medio de transporte público. A charla, que xa foi impartida no primeiro trimestre nos CEIPs A Maía e Barouta e nas escolas unitarias de Covas e A Igrexa, ten como obxectivo concienciar ao alumando sobre a importancia de reducir o uso do automóbil, ao tempo que se potencian medios de transporte alternativos como a bicicleta ou o autobús.
A Policía Local de Ames organiza anualmente iniciativas educativas que leva aos centros de ensino, tanto públicos como concertados, do concello. O proxecto deste ano xira arredor da seguridade viaria e da redución da contaminación ambiental. Dirixido e adaptado a diferentes cursos de Educación Infantil, Primaria e Secundaria, o proxecto recalará nos próximos meses noutros centros de ensino como os IESs de Ames e Milladoiro e o CEIP Agro do Muíño.
A axente da Policía Local de Ames, Cristina Ferreira, é a responsable de impartir esta charla educativa que esta semana se desenvolveu no CEP de Ventín. A través de diapositivas e vídeos, o alumando do segundo e do cuarto curso de Primaria aprendeu as normas de seguridade viarias que deben seguir nos seus desprazamentos a pé, en bicicleta ou en autobús. A charla tamén serviu par pór en valor e ensinar ás crianzas a valorizar a importancia de ter un aire limpo, libre de contaminación. A actividade contou cunha boa acollida por parte das nenas e nenos, que participaron activamente contando as súas propias experiencias e aportando diferentes ideas para a mellora do medio ambiente.
A iniciativa estase a levar a cabo cando o profesorado de cada centro o determina máis axeitado, en relación aos contidos que se están a impartir nas aulas. O proxecto concíbese, desta maneira, como unha actividade complementaria e transversal aos coñecementos dados polas mestras e mestres na escola. O obxectivos da charla é o de facilitar ao alumando información acerca dun uso responsable e seguro dos medios de transporte alternativos, ao tempo que se fomenta a redución do uso do coche e se promove o respecto ao medio ambiente.
Contido relacionado
Compostela 24 Horas: "Seguridade viaria para los alumnos del CEIP de Ventín"