O alumnado de segundo curso de educación primaria do CEIP da Maía participou este luns nunha visita á Casa do Concello, para coñecer como funciona unha administración municipal. Os rapaces e rapazas estiveron acompañados/as do profesorado do centro. O alumnado dividiuse en dous grupos de 25 rapaces e rapazas aproximadamente, para visitar as dependencias da Casa consistorial.

O alcalde, Blas García, e maila concelleira de Planificación e Xestión Educativa, Carmen Porto, foron os encargados de guiar aos rapaces e rapazas polas dependencias da Casa do Concello. Primeiro visitaron o despacho do alcalde e posteriormente estiveron no salón de plenos, onde estiveron acompañados dos/as concelleiros/as do Goberno municipal: Ana Belén Paz, Gustavo Nieto, Víctor Fernández e Uxía García. Ademais, estiveron presentes Oliva Agra, Pablo Beiroa e Ana María Coto, concelleiros/as do Partido Popular de Ames; e Escarlata Pampín e Rosalía Seijas, do BNG de Ames.

Funcionamento da Administración local
O rexedor municipal explicoulles á importancia das eleccións municipais, a través das cales se determina os 21 concelleiros e concelleiras que forman a Corporación municipal e que no pleno de investidura votan para escoller o alcalde ou alcaldesa. Ademais, explicoulles que os/as concelleiros/as que integran o goberno municipal teñen asignadas unhas áreas de xestión.   

Por outra banda, explicóuselle o funcionamento da Administración local e do pleno municipal, que se celebra de forma ordinaria unha vez ao mes. Tamén se falou do número de parroquias que ten o concello de Ames e dos seus dous principais núcleos urbanos: Bertamiráns e O Milladoiro.

A concelleira de Planificación e Xestión Educativa, Carmen Porto, tamén lle preguntou ao alumnado sobre o programa Modo galego, actívao!, impulsado pola Real Academia Galega e o Concello de Ames, que se está desenvolvendo nos centros de ensino de Ames dende o 16 de xaneiro ata o 14 de febreiro.

Por último, o alcalde ensinoulles o libro de honra do Concello de Ames, o bastón de alcalde e a medalla do Concello de Ames, que se lle entrega a todos os concelleiros e concelleiras no momento que toman posesión do seu cargo no pleno de investidura. Antes de rematar entregóuselle a cada neno/as unha mochila con material escolar dentro.

Peticións do alumnado
A rapazada do colexio amesán chegou preparada ás dependencias locais, con varias preguntas e peticións preparadas, xa que nas últimas semanas viñan de estudar a Administración local nas súas clases, tal e como sinalou o profesorado do centro. Así, o salón de plenos foi o lugar escollido para que o alumnado trasladase as súas dúbidas a parte do Goberno local.

Deste xeito, os rapaces e rapazas aproveitaron a visita para formular varias peticións de cara a mellorar as instalacións do seu colexio: arranxar a entrada de auga no pavillón cando chove, pintar o centro de ensino, habilitar máis zonas verdes e máis zonas de xogo con tobogáns, columpios, etc.

Novas relacionadas:

La Voz de Galicia: "Alumnado del CEIP da Maía visitó la casa consistorial de Ames"